لە چوار رۆژى جەژنى قورباندا 22 روداوى هاتوچۆ لە سنورى پارێزگاکانى سلێمانى و هەڵەبجە و ئیدارەکانى گەرمیان و راپەڕین رویانداوە،  بەهۆیەوە 23 کەس بریندار بون و دوو کەسیش گیانیان لەدەستداوە.

هەواڵ:KNNC

رادیۆى فەرمیی بەڕێوەبەرایەتیی هاتوچۆى سلێمانى رایگەیاند؛ لەماوەى چوار رۆژى جەژنى قورباندا، لەپارێزگاى سلێمانى نۆ روداوى هاتوچۆ رویانداوە کە دوانیان لە دەرەوەى سەنتەرى شارەکە بوە، حەوت کەس تێیاندا بریندار بون و کەسێکیش گیانى لەدەستداوە.

هەر بەپێی ئامارەکە، لە پارێزگاى هەڵەبدە سێ روداوى هاتوچۆ رویانداوە و کەسێکیش بریندار بوە.

دواى سلێمانى، ئیدارەى گەرمیان زۆرترین روداوى هاتوچۆى لێ تۆمار کراوە، بەجۆرێک لەو چوار رۆژەدا 8 روداو رویاناوە و 11 کەس بریندار بون و کەسێکیش گیانى لەدەستداوە.

ئیدارەى راپەڕین لە رۆژانى جەژندا کەمترین روداوى هاتوچۆى تێدا تۆمار کراوە، لەو ماوەیەدا دوو روداوى هاتوچۆ رویانداوە، بەڵام لەو دوو روداوەدا پێنج کەس بریندار بون.