وتەبێژی وەزارەتی دەرەوەی ئەمریکا ڕایگەیاند: ڕێزگرتن لە هەرێمی کوردستان کۆڵەکەی سەرەکی پەیوەندییەکانییانە لەگەڵ عێراق، دەشڵێت: پاڵپشتی لەو ڕێککەوتنانە دەکەین کە لەگەڵ حکومەتی هەرێمی کوردستان واژۆ کراون..

هەواڵ:KNNC

تامی بروس، وتەبێژی وەزارەتی دەرەوەی ئەمریکا لە کۆنفڕانسێكی ڕۆژنامەوانیدا ڕایگەیاند: پشتیوانی خۆیان بۆ هەرێمی کوردستانێكی بەهێز دوپات دەکەنەوە، دەشڵێت: ڕێزگرتن لە هەرێمی کوردستان کۆڵەکەی سەرەکی پەیوەندییەکانیانە لەگەڵ عێراق، هەربۆیە هەرێمی کوردستانێكی بەهێز لە بەرژەوەندی ئەمریکا و عێراقیشە.

ئاماژەی بەوەش کرد: پاڵپشتی لەو ڕێککەوتنانە دەکەن کە لەگەڵ حکومەتی هەرێمی کوردستان واژۆ کراون، چونکە ئەو گرێبەستانە لە بەرژەوەندی هەردو لایەنەدایە، جەختیشی کردەوە لەوەی، هانی هەولێر و بەغداد دەدەن پێکەوە بۆ پەرەپێدانی کەرتی غازی کار بکەن.

باسی لەوەشکردوە: غازی هەرێمی کوردستان هاوکار دەبێت کە عێراق لە بواری وزەدا سەربەخۆ بێت، ڕاشیگەیاند: کۆمپانیا ئەمریکییەکان بە ملیاران دۆلار لە هەرێمی کوردستان وەبەرهێناییان کردوە. هیواشی خواست دەرفەتى زیاتر بۆ کۆمپانیا ئەمریکییەکان برەخسێنرێت..