دادگای باڵای تاوانەکانی عێراق سزای لەسێدارەدانی بۆ بەرپرسێکی پێشوی رژێمی بەعسی روخاو دەرکرد کە تاوانبارە بەکوشتنی دەیان کەس لەساڵی (1981) لە شارۆچکەی بەلەدی سەر بەپارێزگای سەڵاحەدین.

هەواڵ: (KNNC)

ئەمڕۆ پێنجشەممە، لەڕاگەیەندراوێکی ئەنجومەنی باڵای دادوەریدا هاتوە؛ تاوانبار خەیروڵڵا حەمادی عەبدوجارۆ، كە لەساڵی (1981) بەڕێوەبەری ئاسایشی شارۆچكەی بەلەد بوە، بەتۆمەتی ئەندام بونیان لە حزبی دەعوەی ئیسلامی بەشداربوە لە كوشتن و شاردنەوەی تەرمی (198) هاوڵاتی عێراقی.

رونیكردوەتەوە كە، دادگای باڵای تاوانەکانی عێراق سزای لەسێدارەدانی بۆ تاوانبارەكە دەركردوە كە چەندین تاوانی بەرامبەر بە هاوڵاتیان عێراق ئەنجام داوە.

ئەوەیخستوەتەڕو، تاوانبارەكە پێشتر و بەر لەساڵی (2003) لە ناوچە جیاجیاكانی عێراق و هەرێمی كوردستان چەندین پۆستی ئەمنی وەرگرتوە، بەشداری کردوە لە تاوانەكانی حزبی بەعس دەرهەق بەهاوڵاتیان.


بەپێی سەرچاوە ئاگادارەکان، تاوانبار خەیروڵا حەمادی عەبد جارۆ- لەساڵانی هەفتاکانی سەدەی رابردو  لە شارەکانی کوردستاندا چەندان پۆستی ئەمنی وەرگرتوە و لەو ماوەیەشدا چەندین تاوانی ئەنجامداوە.

بەپێی هەمان سەرچاوە؛ ناوبراو لەماوەی ساڵانی (1971 - 1972) بەرێوەبەری ئاسایشى سەرشەقام بوە لە سلێمانی، دواتر بوەتە بەرێوەبەری ئاسایشی دەربەندیخان، دوکان، زاخۆ و دهۆک و پاشان لە شوعبەی  سێی ئەمنی بەغدا وەک ئەفسەری ئەمن بەشداری لەلێکۆڵینەوەکان کردوە کە ئەو شوعبەیەش تایبەت بوە بەکورد.