دوای كۆبونەوەیان، فراكسیۆنە كوردییەكانی ئەنجومەنی نوێنەرانی عێراق راگەیەندراوێكیان بڵاوكردەوە كە تیادا هاتوە: بڕیارەكەی وەزارەتی دارایی پێچەوانەی دەستوری عێراقە و پێویستە سەرك كۆمار و بەرپرسانی دیكەی نوێنەری كورد لە بەغداد هەڵوێستی رونیان هەبێت.

هەواڵ: (KNNC)

فراكسیۆنه‌ كوردستانییه‌كان رایانگەیاند: بەسەرنجدان لەبارودۆخی سەختی فەرمانبەرانی هەرێمی كوردستان کە بەهۆی سیاسەتەکانی وەزارەتی دارایی فیدراڵیەوە گەیشتوەتە ئاستی برسیه‌تی، ئەم بڕیارە ئامانجێكی سیاسیی له‌ پشته‌‌ و پێشێلکردنی دەستوری عێراقە، کە به‌ پێی مادده‌ی (37 - یه‌كه‌م) گەرەنتی پاراستنی شكۆی هاوڵاتییان ده‌كات بەبێ له‌به‌رچاوگرتنی بارودۆخەکان.

دەشڵێن: لەسەر بنەمای ئەرکی مرۆیی و بەرپرسیاریه‌تی ئەخلاقی، داوایان لە محه‌مه‌د شیاع سودانی، سەرۆک وەزیرانی عێراق کردوە دەستوەردانی پەلە بکات بۆ ناردنی موچەی فەرمانبەرانی هەرێمی کوردستان و مافی هاوڵاتییان بە هیچ ناکۆکییەکی سیاسی و تەکنیکییەوە نەبەستێتەوە، ئەوەش مافێكی ده‌ستوری و مرۆییه‌ بۆ هاوڵاتییان ده‌سته‌به‌ر كراوه‌.

فراكسیۆنه‌ كوردستانییه‌كان ئەوەیان خستوەتەڕو، داوای چارەسەری هەمیشەییان بۆ کێشەی موچەی موچه‌خۆرانی هه‌رێمی كوردستان کردوە و بۆ ئه‌م مه‌به‌سته‌ش چاوه‌ڕوانی وه‌ڵامی سه‌رۆك وه‌زیرانی عێراق ده‌كه‌ن بۆ گرتنه‌به‌ری رێكاری پێویست بۆ چارەسەركردنی كێشەی فەرمانبەرانی هەرێمی کوردستان.