دەزگای ئاسایشی نیشتمانیی عێراق ڕۆژی هەینی ڕایگەیاند کە هێزەکانیان دەستیان بەسەر ٣٠٠ محەویلەی کارەبایی قاچاغدا گرتووە و دوو تۆمەتباریشیان لە شاری بەغدا دەستگیرکردووە.
لە ڕاگەیەندراوێکی دەزگاکەدا هاتووە کە پاش بەدواداچوونی مەیدانی و چاودێریکردنێکی ورد، توانراوە ئەو محەویلە کارەباییە قاچاغانە لەناو یەکێک لە گەراجەکانی پایتەختدا بدۆزرێنەوە و دەستیان بەسەردا بگیرێت.
هەروەها لە ئۆپەراسیۆنەکەدا، دوو تۆمەتبار لەکاتی تاوانەکەدا و بە بەڵگەوە دەستگیرکراون و ڕێکاری یاساییان بەرامبەر گیراوەتەبەر.
ئاسایشی نیشتمانی جەختی لە بەردەوامیی هەوڵە هەواڵگری و مەیدانییەکانی کردەوە بۆ ڕاوەدوونانی تۆڕەکانی قاچاغچێتی و ڕێگریکردن لە یاریکردن بە ئابووریی نیشتمانی، بە ئامانجی گرتنەبەری ڕێکاری توند بەرامبەر بە سەرپێچیکاران.
37 جار خوێندراوەتەوە