راوێژکارێكی رێبه‌ری باڵای ئێران ئاشكرایدەكات؛ لەبەرامبەر هەڵگرتنی گەمارۆ ئابورییەکان، وڵاتەكەیی ئامادەیە لەگەڵ ئەمەریکا رێکبکەوێت و دەستبەرداری یۆرانیۆمی پیتێنراو ببێت.

هەواڵ: (KNNC)

لە چاوپێکەوتنێکدا لەگەڵ کەناڵی (NBC NEWS)ـی ئەمەریكی، عەلی شەمخانی، راوێژكاری عەلی خامنەیی رێبەری باڵای شۆڕشی كۆماری ئیسلامی ئێران رایگەیاند: بەمەرجی هەڵگرتنی گەمارۆ ئابورییەكانی سەروڵاتەكەی، تاران پابەندی كه‌مكردنه‌وه‌ی پیتاندنی یۆرانیۆم و بڕەكەی دەگەیەنێت بە كەمترین ئاست هەروەها تەنا لە بورای مەدەنیشدا بەکاریبهێنێت.


وتوشیەتی: دوای هەڵگرتنی دەستبەجێی سەرجەم گەمارۆ ئابورییەکان، رێگەش بەپشکنەرە نێودەوڵەتییەکان دەدات چاودێری پڕۆسەکە بکەن.


رونیكردوەتەوە، ئەگەر ئەوەی ئەمەریکییەکان دەیڵێن جێبەجێی بکەن، بەدڵنیاییەوە دەتوانرێت پەیوەندییەكی باشتر لەنێوان واشنتۆن و تاراندا دروستبكرێت، ئەوەش لە داهاتویەکی نزیکدا دۆخەکە باشتر دەکات.


ئەمڕۆ پێنجشەممە، دۆناڵد ترەمپ، سەرۆکی ئەمەریکا رایگەیاند: بەئامانجی گەیشتن بە رێككەوتن  وڵاتەكەی لەگەڵ ئێران دانوستانەكان ئەنجام دەدات، كە ئێستا لەو بڕوایەدایە گەیشتن بەرێككەوتن نزیكبزنەتەوە، واشنتۆن دەیەوێت تاران بەهێزبێت، بەڵام نابێت چەكی ئەتۆمیی هەبێت.