بەمەبەستی ئەنجامدانی دانوستانی راستەوخۆ لە نێوان مۆسكۆ و كیێڤ، ڤۆلۆدیمیر زێلێنیسكی سەرۆكی ئۆكرانیان گەیشتە ئەنقەریی پایتەختی توركیا.


هەواڵ: (KNNC)


ئەمڕۆ پێنجشەممە، میدیاكانی جیهان بڵاویانكردەوە؛ بەمەبەستی ئەنجامدانی دانوستانی راستەوخۆ لە نێوان مۆسكۆ و كیێڤ، ڤۆلۆدیمیر زێلێنیسكی سەرۆكی ئۆكرانیا گەیشتە ئەنقەرەی پایتەختی توركیا.


ئاماژەیان بۆ ئەوەكردوە، بڕیار وایە سەرۆكی ئۆكرانیا لە پەراوێزی كۆبونەوەكانی نێوان ئۆکرانیا و روسیا لەگەڵ رەجەب تەیب ئەردۆغان هاوتا تورکەکەی کۆدەبێتەوە.


لای خۆشیەوە وەزیری دەرەوەی ئەو وڵاتە رایگەیاندوە: بۆ كۆتایی هاتن بەجەنگی سێ ساڵەی نێوان ئۆكرانیا و روسیا، لەسەر بانگێشتی توركیا لەگەڵ روسیا بەشێوەی راستەوخۆ گفتوگۆ دەكەن.


پێشتریش میدیای فەرمی روسیا ئاماژەی بۆ ئەوەكردبو، كۆشكی كرملین بەشداری كۆبونەوەكەی ئەنقەرە دەكات و پێش نیوەڕۆی ئەمڕۆ شاندێكی دانوستان گەیشتونەتە ئیستەنبوڵ و بڕیار وایە لە پاشنیوەڕۆوە دەست بە كۆبونەوەكان بكرێت.


هاوكات ئەمڕۆ پێنجشەممە دۆناڵد ترەمپ سەرۆكی ئەمەریكا رایگەیاند: دانوستان بۆ كۆتایی هاتن بەجەنگی ئۆكرانیا لە ئەنقەرە لەنێوان مۆسكۆ و ئۆكرانیا بەڕێوەدەچێت و ئەگەر دەرفەتی هەبو، ئەگەری هەیە سبەینێ هەینی سەردانی ئەو وڵاتە بكات.