ئەسغەر جەهانگیر، وتەبێژی دەزگای قەزایی ئێران ڕایگەیاندوە؛ حوکمی لەسێدارەدان بۆ ئەمیر حسێن مەغسودلو ناسراو بە ئەمیر تەتلۆ دەرچوە ، بەڵام تا ئێستا بڕیارەکە لەلایەن دادگای باڵای ئێرانەوە یەکلایی نەکراوەتەوە و لەژێر پێداچونەوەدایە.

هەواڵ:KNNC


وتەبێژی دەزگای قەزایی ئێران لە لێدوانێکیدا بۆ ڕۆژنامەنوسان ڕایگەیاندوە، تەتلۆ بە تۆمەتی "هاندانی گەندەڵی و لەشفرۆشی" سزای 10 ساڵ زیندانی بەسەردا سەپێنراوە و لە ئێستادا حوکمەکەی بەسەر دەبات.

ئاماژەی بەوەشکردوە، تەتلۆ بە تۆمەتی "سوکایەتیکردن بە شوێنە پیرۆزەکان" سزای 5 ساڵ زیندانی بەسەردا سەپێندرابو، بەڵام سزاکە لەلایەن دادگای باڵا هەڵوەشێنرایەوە و ڕەوانەی هەمان لق کرا بۆ دوبارە دادگاییکردن.

جەهانگیر ئاماژەی بەوەشکردوە، "لقی شەش"ی دادگا تۆمەتی "سوکایەتیکردن بە شوێنە پیرۆزەکان"ی بە سەلمێنراو زانی و بە ئاماژەدان بە ماددەی 262ی یاسای سزادانی ئیسلامی، سزای لەسێدارەدانی بۆ ئەو گۆرانیبێژە دەرکرد.

بە گوتەی وتەبێژی دەسەڵاتی دادوەری، بەهۆی تانەدانەکەوە، ئەم بڕیارە لە ئێستادا لە ژێر پێداچوونەوەدایە لەلایەن دادگای باڵا و تا ئێستاش بڕیاری کۆتایی سەبارەت بە پشتڕاستکردنەوە یان هەڵوەشاندنەوەی ڕانەگەیەندراوە.

 ئاماژەی بەوەشکرد، دوای ڕاگەیاندنی بڕیارەکەی دادگای باڵا زانیاری پێویست  لەباەری چارەنوسی هونەرمەندەکەوە دەخەنە ڕو .

ئەو هونەرمەندە ئێرانییە، کە لە کانونی دوەمی ساڵی 2023، دوای ئەوەی نزیکەی شەش ساڵ لە تورکیا ژیا و دواتر لەسەر داوای ئێران گەڕێندرایەوە بۆ ئەو وڵاتە.

تەتلۆ ڕوبەڕوی  چەندین تۆمەتی جۆراوجۆر بوەتەوە،  تۆمەتەکانی بریتین لە هاندانی گەندەڵی و لەشفرۆشی، سوکایەتی بە پێغەمبەری ئیسلام، چالاکیی دژی حکومەتی ئێران، بڵاوکردنەوەی ناوەڕۆکی قێزەون، دامەزراندنی سایتی گرەوکردن و تاوان دژی حەیا.