ئەمرۆ چوارشەممە، نرخی زێڕ ئاستێکی پێوانەیی تۆمارکرد و ئۆنسەیەک بە 3289 دۆلار مامەڵەی پێوەدەکرێت.

ئابوری:KNNC

ئەمڕۆ چوارشەممە، لەگەڵ کردنەوەی بازاڕە داراییەکان نرخی یەک ئۆنسە زێڕ بەرێژەی (1.7%) بەرزبوەوە و گەیشتە 3289.47 دۆلار.

هاوکات، بەپێی داتاکانی ئاژانسی رۆیتەرز، نرخی ئایندەی زێڕی ئەمریکا بەڕێژەی 1.9% بەرزبوەوە و بۆ یەکەمجارە ئاستی سێ هەزار و 300 دۆلاری تێپەڕاند.

تیم واتەر، شرۆڤەکاری باڵای بازاڕ لە کۆمپانیای KCM Trade دەڵێت: دابەزینی بەهای دۆلار، کاریگەری بەردەوامی لەسەر ناجێگیری بەهای زێڕ دەبێت.

پێوەرەکانی دۆلار بەڕێژەی 0.4% لە بەرامبەر ڕکابەرەکانی دابەزی، ئەمەش بووەتە هۆی زیادبونی خواست لەسەر زێڕ.

زێڕ، وەک وەبەرهێنانێکی سەلامەت لە کاتی نادڵنیایی جیۆپۆلەتیکی و ئابوریدا سەیر دەکرێت، ئەمساڵ بەرزترین ئاستی تۆمارکردوە و زیاتر لە 24% بەرزبونەوەی بەخۆیەوە بینیوە.

لاوازبوونی دۆلار و پەرەسەندنی گرژییە بازرگانییەکانی نێوان چین و ئەمەریکا، نیگەرانییەکانی گەشەی ئابوری جیهانی بە هۆکارە سەرەکییەکانی بەرزبونەوەی نرخی زێڕ دادەنرێن.