سەرۆكی وەزیرانی ئیسرائیل رایدەگەیەنێت: ئەوەی لە غەززە رودەدات سەرەتایە و بەنیازن تا ئەو كاتەی حەماس لەناودەبەن جەنگ بەردەوام بێت  و جەختیش دەكاتەوە بۆ بەدەستهێنانی ئامانجەكانیان رێگرییان نییە.



هەواڵ: (KNNC)

دوای دەستپێکردنەوەی هێرشەکانی ئیسرائیل بۆ سەر کەرتی غەززە، لەیەکەم لێدوانیدا بنیامین نەتانیاهۆ، سەرۆك وەزیرانی ئیسرائیل رایگەیاند: ئەوەی ئێستا لە غەززە رودەدات تەنها سەرەتایە، بۆیە تا ئەو كاتەی دیلەكان ئازاد دەكرێن و بزوتنەوەی حەماسی فەلەستینی لەناودەبەن، جەنگ بەردەوام دەبێت.

ئاماژەی بۆ ئەوەشكرد، بۆ بەدەستهێنانی ئامانجەكانیان لە جەنگی غەززە هیچ رێگرییەكیان نییە و بەنیازن نەخشەی رۆژهەڵاتی ناوەڕاست بگۆڕن

بەمەبەستی گەڕاندنەوەی سەرجەم بارمتەكانی لای بزوتنەوەی حەماس، لە رۆژی سێشەممەوە جارێكی دیكە ئیسرائیل هێرشەکانی بۆ سەر کەرتی غەززە دەستپێكردەوە و بەهۆیەوە نزیكەی هەزار قوربانی لێكەوتوەتەوە.