هێزە ئۆپۆزسیۆنەكانی سوریا كە سەر بەتوركیان، چونە ناو شاری حەلەب و دەستیان بەسەر دو كولێژی سەربازیدا گرت.

هەواڵ: (KNNC)

لە راگەیەندراوێكدا هێزەكانی ئۆپۆزسیۆنی سوریا بڵاویكردەوە؛ دوای روبەڕوبونەوەی توند لەگەڵ رژێمی سوریا و چونە ناو شاری حەلەب و تەواوی لادێکانی رۆژئاوای وڵاتەکەیان، هێزەکانیان و هاوپەیمانەکانیان توانیویانە کۆنترۆڵی هەردو کۆلێژی سەربازی و تۆپخانە لە گەڕەکی زەهرادا بكەن.


هێزەکانی ئۆپۆزسیۆنی سوریا کە لەلایەن تورکیاوە پشتگیری و هاوکاری دەکرێن، ئاماژەیان بۆ ئەوەشكردوە، لە ئۆپراسیۆنەكەدا، هەریەك لە هێزەكانی تەحریر شام سوپای نیشتیمانی سوریای ئۆپۆزسیۆن بەشدارییان كردوە.

گروپە چەکدارەکان  کە ماوەی سێ ڕۆژە دژ بە هێزەکانی رژێم لە شەڕ و پێکدادان دان، لە ڕۆژئاوای شاری حەڵەبەوە بەرەو ناوەندی شارەکە پێشڕەوی دەکەن و هێڵی بەرگریی هێزەکانی ڕژێمیان لە میحوەرەکانی حەمدانیە، حەلەبی نوێ و زەهرا شکاند و چونەتە ناوەندی حەلەبەوە.

میدیاکان بڵاویان کردەوە، ئەو گروپانە دو تەقینەوەی خۆکوژیان لە ڕێگەی ئۆتۆمبێلی بۆمبرێژکراوەوە لەناو حەڵەب ئەنجامداوە.