‎‎هەندێک جار هۆکاری ئازار لە قاچدا، هەوکردن و بونی کلسە لە ژێی ئەخیلس کە لەپشتی پێدایە و هەندێک جاریش ئێسکی زیادەی لەگەڵدایە.

 

تەندروستی:KNNC

 

د. هەڤین کەمال شا پسپۆڕی بەنج و ئازارشکاندن باس لەو هۆکارانە دەکات کە دەبنە هۆی دروستبونی ئێسکی زیادە لە پشتی قاچ، کە ئەمانەن:

 

1- لەو کەسانەی  زۆر بەپێوە دەوەستن و زۆر قاچیان ماندو دەکەن بۆ ماوەیەکی زۆر ، یاخود سەرکەوتنی قادرمەی زۆر.

 

2- لەوانەیە بەهۆی بەرکەوتنی زەبرەوە بێت، وەرزشەوانەکان زیاتر توشی دەبن، کە ژێیەکە دەئاوسێت و دەدڕێت

 

3- لەو کەسانەی وەرزشی ڕاکردن دەکەن بەڕێژەیەکی زۆر، یاخود ئەوانەی لە تەمەنی کامڵبوندان و کۆتایی هەفتەکان لەوانەیە وەرزشێکی وەکو بالە ، یاخود تێنس بکەن و ماندوی بکەن.

بەشێوەیەکەی گشتی نیشانەکانیش ئەمانەن:

 

1-لەپێشدا بەئازارێکی کەم دەست پێدەکات لە قولەپێ و سەرو قولەپێ،لەپشتی پوزەوە، لەکاتی ماندوبون و وەرزش و ڕاکردندا لەدوایدا ئازارەکە زیاد دەکات و لەوانەیە بە بەردەوامی هەبێت.

2-ئازارێکی تیژ و بێزارکەر لە کاتی ڕاکردن و رۆشتن و سەرکەوتن بەسەر قادرمە.

3-ئاوسانی قولەپێ و هەندێک جاریش بەشی پێشەوەی پێ.

4-هەندێک جار ڕەق بون و ئازار لەکاتی دەستلێدانی ژێیەکە دروست دەبێت بەتایبەتی کاتی بەیانیان، دوای هەندێک چالاکی کەمتر دەبێتەوە.

‎
‎ئەو هۆکارانەی ئەگەری توشبون زیاد دەکەن:

 
 ڕەگەز؛ زیاتر لەپیاواندا ڕودەدات

‎ تەمەن؛ لەگەڵ زیادبونی تەمەن زیاد دەکات

‎ ئەو کەسانەی فلات فوتن و پێیان تەختە فشار زیاتر دەخەنە سەر بەستەرەکە،  قەڵەوی، تووندی ژێیەکە خۆی

‎  لەپێکردنی قۆنەرەی گەرم لەکاتی وەرزش، هەروەها راکردن لەشوێنی شاخاوی و گرداویدا ڕێژەی توشبون زیاد دەکات، بەگشتی لەوەرزی سارد و سەرما زیاترە .

‎هەندێک حاڵەتی نەخۆشی وەکو فشاری خوێن ، نەخۆشی پێست، بەکارهێنانی هەندێک دژە بەکتریا

‎چارەسەرەکان:

 
‎باشترین چارەسەر پشودان و بەکارهێنانی ئازارشكێن و دژەهەوکردنەکان و بەکارهێنانی پاکی سارد، وەرزشی تایبەت بۆ ڕاکێشان و سترێچکردنی ژێیەکە، لەگەڵیدا وەرزش بۆ بەهێزکردنی ماسولکەکانی پوز،  لەپێکردنی پێڵاوی گونجاو و تەندروست ، هەندێک جار پێویستە بنکەفی تایبەت دابنرێت .
‎

1154 جار خوێندراوەتەوە