قایمقامیەتی سلێمانی کۆمەڵێک بڕیاری نوێی بۆ ڕێگریکردن لە زیادەڕۆیی و پاککردنەوەی شۆستە و شەقامەکان دەرکرد و هۆشداریش دەداتە ئەوەی، ڕێکاری یاسایی بەرامبەر سەرپێچیکاران دەگیرێتەبەر.

قایمقامیەتی سلێمانی لە ڕاگەیەندراوێکدا بڵاویکردەوە، لە کۆبوونەوەیەکدا بە سەرپەرشتیی فازڵ عومەر، قایمقامی سلێمانی بەوەکالەت و بە ئامادەبوونی لەیلا عومەر، سەرۆکی شارەوانیی سلێمانی، بەڕێوەبەری ئاسایشی ناوشار، سەرۆکی لیژنە هاوبەشەکان، بەڕێوەبەری پۆلیسی ڕێکاری و نوێنەرانی هاتووچۆ و ئاسایش، گفتوگۆ لەبارەی دیاردەی زیادەڕۆیی کراوە و چەند بڕیارێک دراون.

ئاماژەی بەوەشکردووە، لە کۆبوونەوەکەدا بڕیاردراوە بە ڕێکخستنەوەی کۆشک، مێز و عەرەبانەکان و لابردنی سەرجەم ئەو ڕێگرییانەی کراونەتە سەر شۆستە و شەقامەکانی شارەکە.

لە بەشێکی دیکەی بڕیارەکاندا جەخت لەوە کراوەتەوە، ڕێکاری یاسایی توند دەگیرێتەبەر بەرامبەر بەو کەسانەی مامەڵەی نایاسایی بەو شوێنانەوە دەکەن، یان ئەوانەی پابەندی ڕێنماییەکانی لیژنە پەیوەندیدارەکان نابن.