کونسوڵخانەى ئەمەریکا لە هەولێر باس لە هەوڵى عێراق دەکات بۆ بەکارهێنانى سیستمى ئەلیکترۆنى دراو و دەڵێت: لەڕێیەوە دەستت بە دۆلارى ئەمەریکى دەگات بەو نرخەى فەرمییە و مامەڵەى پێوە دەکرێت.

ئابورى:KNNC

کونسوڵخانەکە لە بڵاوکراوەیەکدا دەڵێت: عێراق خەریکی ئەوەیە قبوڵکردن و بەکارهێنانی پارەدانی ئەلیکترۆنی زیاد بکات، پارەدان بە سیستمی ئەلیکترۆنی پڕۆسەیەکی سەلامەتترە و لە ڕێیەوە دەستت دەگات بە دۆلاری ئەمەریکی و بە نرخە فەرمییەکەی مامەڵەی پێوە دەکرێت.

ئاماژە بۆ ئەوەکراوە کە حکومەتى عێراق رێنمایی وەزارەتەکانی کردوە سیستمی پارەدانی ئەلیکترۆنی جێبەجێبکەن لەو شوێنانەی کاری کڕینیان تێدادەکرێت و لە هەمان کاتیشدا خەریکی پێداچونەوەیە بە یاساکانی تایبەت بە پارەدانی ئەلیکترۆنی.

هەروەک باسى لە سودەکانى ئەم رێگەیە کردوە بۆ بەکارهێنانى دراوەکان و دەڵێت: ئاسان دەستت بە خزمەتگوزارییە فەرمییە بانکیەکانی وەک قەرز، بیمە، پارەدان و پارە پاشەکەوتکردن دەگات.

ئەگەرى کەمتر دزین و ونکردن و تاوانى داراییش لەلایەن کونسوڵخانەکەوە بە سودێکى دیکەى ئەم سیستمە دانراوە و باس لەوەشکراوە کە لەوڕێیەوە تواناى وەبەرهێنان زیاتر دەبێت و هانى بەکارهێنەرانیش دەدات لەڕێی چەناڵە فەرمییە بانکییەکانەوە مامەڵەکانیان ئەنجام بدەن.