بەرپرسێکی باڵای سوپای عێراق لەبارەی لەشکرکێشیەکانی تورکیا بۆ سەر خاکی هەرێم جەخت لەوە دەکاتەوە، تورکیا چاوی لەسەر موسڵە و دەیەوێت بەبیانوی هەبونی پەکەکەوە ئەو پارێزگایە کۆنتڕۆڵ بکات.

هەواڵ:KNNC

ئەو بەرپرسەی سوپای عێراق کەپلەى ژەنەراڵە و نەیویستوە ناوی بهێنرێت، بۆ دەنگی ئەمریکا لەبارە هاتنی تورکیاوە بۆ ناو خاکی هەرێم باسیلەوە کردوە، شەڕی پارتیزانی لە ناوچە شاخاوییەکاندا پێویستی بەو هێزە زەبەلاح و گەورە و تانک و زرێپۆشە نییە و دەڵێت: تورکیا تەنها بۆ یەکلاکردنەوەی ئەو شەڕە نەهاتوە. 

دەشڵێت: لە رابردو حکومەتی عێراقیش نەیتوانیوە ئەو ناوچانە بە زەبری هێز بخاتەوە ژێر ڕکێفی خۆی بۆیە ئەگەر تورکیا بیەوێت ئەو ئەزمونە دوبارە بکاتەوە لە شوێنێکدا کە وڵاتی خۆی نییە، سەرکەوتو نابێت و بۆی ناکرێت.

وتوشیەتی: هێنانی ئەو هەمو کەرەستە و کەلوپەلە سەربازیە لەلایەن تورکیاوە، لە ڕوی لۆژیکی سەربازی و لە ڕوی ڕەهەندە سیاسی و ستراتیژییەکانیشەوە بابەتی دیکەی لەپشتە و دەڵێت: تورکیا بابەتی موسڵ و ویلایەتی موسڵی وەلاوە نەناوە و وەک دەزانرێت ساڵانە لە بودجەی وڵاتی خۆیدا بودجەیشی بۆ دادەنێت.