شارەزایەكی كەشوهەوا وادەی هاتنی شەپۆلێكی گەرمای تاقەت پڕوكێنی راگەیاند و سەبارەت بە كەشوهەوای ساڵی داهاتو مژدەی بەدانیشتوانی سەنتەری شارەكاندا كە بەراورد بەساڵی رابردو زیاتر سپی پۆش دەبن.


هەواڵ: (KNNC)



محەمەد كەمال، شارەزای كەشوهەوا بە (KNN)ـی راگەیاند: بەپێی پێشبینییەكان لە سبەینێوە شەپۆلێكی دیكەی گەرمای "تاقەت پڕوكێن" سەرجەم ناوچەكانی هەرێمی كوردستان دەگرێتەوە و چەقی كاریگەریی گەرماكەش دەكەوێتە رۆژانی پێنجشەممە و هەینی و تا رۆژی شەممە بەردەوام دەبێت، رۆژی دواتر شەپۆلەكە كۆتایی پێدێت.


وتیشی: چاوەڕوان دەكرێت لەماوەی ئەو شەپۆلەدا، پلەكانی گەرما لەنێوان (7 بۆ 8) پلە سیلیزی بەرز بێتەوە، ئەوەش وادەكات گەرماكەی "تاقەت پڕوكێن" بێت و سەرجەم ناوچەكانی عێراق بەپلەی جیاواز بگرێتەوە.


رونیكردوە، پێشبینی دەكرێت رۆژانی پێنجشەممە و هەینی پلەكانی گەرما لە ناوچەی گەرمیان لە نێوان (50 بۆ 51) پلەی سیلیزی بەرزبێتەوە، كە لەعێراقیش بەهەمان شێوە پلەیەكی بەرزی گەرمای نوێی پێوانەیی تۆمار دەكات و لەگەڵ بەرزبونەوەی رێژەی شێ بۆ لە (10%) كە ئەوەش وادەكات هەست بە گەرمایەكی زیاتر بكرێت.


محەمەد كەمال راشیگەیاند: لەبەر ئەوەی گەرمیان رێژەی سەوزایی كەمە، پلەكانی گەرما بەراورد بە شارەكانی دیكەی هەرێم زیاتر بەرزدەبێتەوە، بەڵام ناوچە كوێستانییەكانی سلێمانی و هەولێر بەگشتی و حاجی ئۆمەران بەتایبەتی پلەكانی گەرما زۆر بەرز نابێتەوە.


سەربارەت بە ئەو شەپۆلە خۆڵبارینەی هەرێمی كوردسان دەگرێتەوە ئاماژەی بۆ ئەوەكرد، شەپۆلی خۆڵبارین ناوەڕاست و خواروی عێراق دەگرێتەوە، ئەو شەپۆلانەی كە رو لەهەرێم دەكەن، كاریگەری شەپۆلەكانی ئەوێیە و هیچ پێشبینییەك نییە كە لە هەرێم خۆڵبارین روبدات.


محەمەد كەمال، شارەزای كەشوهەوا لە بەرنامەی پرسی رۆژ وتیشی: لەگەڵ ئەوەی لە ئێستاوە پێشبینی كردن بۆ باران بارینی ساڵی داهاتو قورسە، بەڵام پێدەچێت كەمێك باران بارین دوابكەوێت، ئەوەی جێگەی دڵخۆشییە كە دوا كەوتنی باران بارینەكە گرفت بۆ جوتیاران و كشتوكاڵكردن لە هەرێم دروست ناكات، مژدەشی بە دانیشتوانی سەنتەری شاررەكانی هەرێمدا كە ساڵی ئایندە رێژەی بەفر زیاتر دەبارێت و بەراورد بە ساڵی رابردو لەسەرنتەری شارەكان زیاتر سپی پۆش دەبن.