لە پێنج مانگی ئەم ساڵدا لە عێراق 10 تەن ماددەی هۆشبەر و کارتێکەری عەقڵی دەستی بەسەردا گیراوە و هەزاران بازرگان و بەکارهێنەریش دەستگیر کراون.

هەواڵ:KNNC

حوسێن یوسف تەمیمی، وتەبێژی بەڕێوەبەرایەتیی گشتیی کاروباری مادەی هۆشبەر لە عێراق راگەیاند، لە پێنج مانگی سەرەتای ئەم ساڵ 10 تۆن مادەی هۆشبەر و کارتێکەری عەقڵی دەستیان بەسەردا گیراوە.

وتیشی: یەک تۆن لە جۆرە جیاوازەکانی مادەی هۆشبەر بوە و  نۆ تۆنیش ماددەی کارتێکەری عەقڵی بون.

ئاماژەی بەوەشکردوە، شەش هەزار بازرگان و بەکارهێنەری هۆشبەر دەستگیر کراون، سزا بۆ زیاتر لە دو هەزاریان دەرچوە.

بە گوێرەی ئامارەکان هەر لەم ساڵدا 20 تۆڕى نێودەوڵەتى و 204 تۆڕى نێوخۆیی بازرگانیکردن بە مادەى هۆشبەر هەڵوەشێندراونەتەوە، 72 بازرگانی نێودەوڵەتی مادەی هۆشبەر سزای لەسێدارەدانیان بۆ دەرچوە، 25 بازرگانی مادەی هۆشبەریش لە روبەڕوبونەوەکاندا کوژراون یان بریندار بون.