پارێزەرێك رایدەگەیەنێت، یەکێک لە کەیسە هەرە ترسناکەکان هێنراوەتە دادگــــــا، کە پیاوێک داوایەکی لەسەر هاوسەرەکەی تۆمارکردوە و گومانی لە نەسەبی منداڵەکانی هەیە.

پارێزەر گۆران ساڵح عەبدولقادر بە کەی ئێن ئێنی راگەیاند: پیاوێك لە دادگای باری کەسێتی هەرێم سکاڵایەکی لەسەر هاوسەرەکەی تۆمارکردوە و رایگەیاندوە، کە گومانی لەوە هەیە کە منداڵەکانی هی خۆی بن.

ئاماژەی بەوەشکردوە، ئەو ژن و پیاوە خەڵکی ناوەڕاستی عێراقن و کەیسەکەیان هێناوەتە هەرێمی کوردستان.

باسی لەوەشکردوە، دادگا داوای ئەو پیاوەی بە بیانوی دروست بونی فیتنە و ئاژاوە رەتکردوەتەوە، دواتر ئەو کەسە تانەی لە بڕیاری دادگا داوە، دادگای تەمیز داواکەی قبوڵ کردوە و پشکنینی DNA بۆ منداڵەکانی ئەنجامدراوە.


گۆڕان ساڵح لە بارەی ئەنجامی پشکنینەکەوە دەڵێت: دوای پشکنینەکە دەرکەوتوە کە لە کۆی چوار منداڵەکە تەنیا یەك منداڵیان لە نەسەبی خۆیەتی و داوای کردوە کە سێ منداڵەکەی دیکە لەسەر نەسەبی ئەو لاببرێن.