حکومەتی عێراق بەنیازە سکاڵای یاسایی لەسەر ئێران تۆمار بکات بەهۆی ئەوەی ژینگەی عێراقی تێکداوە و خراپی کردوە. 

وەزارەتی سەرچاوەکانی ئاو رایگەیاند: حکومەتی عێراق سکاڵای یاسای لە دادگا نێودەوڵەتییەکان لەسەر ئێران تۆماردەکات بەهۆی ئەوەی رێڕەوی چوار ئاوی گۆڕیوە و ئەو روبارانەی لە عێراق وشک کردون.

عەون زیاب، راوێژکاری وەزارەتی سەرچاوەکانی ئاو رایگەیاند: ئێران رێڕەوی هەریەك لە روباری ئەڵوەند و سیروان و عەباسیان و زامکانی لە ناو خاکی وڵاتەکەیدا گۆڕیوە.

باسی لەوەشکردوە، روباری سیروان یەکێکە لە سەرچاوەکانی روباری دیجلە و بەنداوی دەربەندیخان و روباری ئەڵوەندیش زۆربەی دێهاتەکانی پارێزگای دیالە پاراو دەکات و لەسەر ئاو دەژین، ئێران ئەو ئاوانەی وشک کردون.

زیاب دەشڵێت: گۆڕینی رێڕەوی ئەو ئاوانە سەرپێچییەکی گەورەیە و دژی یاسا نێودەوڵەتییەکان و نەرێتێکی زۆر خراپە.

راشیگەیاند: عێراق پەنا دەباتە دادگا نێودەوڵەتییەکان لەسەر ئەوەی کە ئێران بەشە ئاوی عێراق بەرناداتەوە و داواش لە رێخکراوە مرۆڤ دۆستەکان دەکات پاڵپشتی داواکەی بکەن، چونکە ئەو کارەی ئێران ژینگەی عێراق تێکدەدات و هەڕەشەیە لەسەر ژیانی عێراقییەکان.