میدیاکانی تورکیا لێکدانەوەی جیاواز بۆ سەردانەکەی سەرۆکی حکومەت دەکەن

KNN : Kurdish News Network
06:09 - 16/04/2022
ڕاپۆرت

میدیاکانی تورکیا سەردانی حکومەتی هەرێمی کوردستان بۆ تورکیا و کۆبونەوەی لەگەڵ سەرۆک کۆمار و سەرۆکی میتی تورکیا وەک ئامادەکارییەک بۆ ئۆپراسیۆنێکی بەرفراوانی سەربازیی سوپای ئەو وڵاتە لەناو خاکی هەرێمی کوردستان لەدژی پەکەکە لە قەڵەم دەدەن، هەندێک میدیاش ئاماژە بەوەدەکەن تورکیا دەیەوێت غازی سروشتیی هەرێمی کوردستان بۆ ئەوروپا رەوانە بکات.


پێگەی تۆرێ سەربەخۆی هەواڵ بیانێت (BIANET) لە تورکیا بڵاویکردوەتەوە، ئامادەبونی هاکان فیدان سەرۆکی دەزگای هەواڵگریی تورکیا (میت)  لە کۆبونەوەی ئەردۆغان و مەسرور بارزانیدا ئاماژەیە بۆ ئامادەکارییەکانی سوپای تورکیا بۆ ئەنجامدانی ئۆپراسیۆنێکی سەربازیی لەناو خاکی هەرێمی کوردستاندا.

 

سایتی ئەنسۆن هەبەر (ensonhaber)ی تورکیاش کە نزیکە لە پارتی دەسەڵاتداری داد و گەشەپێدان، ئاکەپە سەبارەت بە ناوەرۆکی ئەوکۆبونەوەیە بڵاویکردوەتەوە گرنگرترین بابەتی کۆبونەوەی ئەردۆغان و بارزانی، ئۆپەراسیۆنی سەربازیی سوپای وڵاتەکەبوە لەناو خاکی هەرێمی کوردستان کەپێدەچێت بەمنزیکانە دەستپێبکات.

 

هەر ئەوسەرچاوەیە ئاشکرایکردوە; بابەتێکی دیکەی کۆبونەوەکە گفتوگۆکردنبوە سەبارەت بە هەناردەکردنی غازی سروشتیی هەرێمی کوردستان لەرێگەی تورکیاوە.

 

لەلایەکی دیکەوە ئاژانسی هەواڵی مێزوۆپۆتامیا کە میدیایەکی باکوری کوردستانە، سەرنجی لەسەر دانەنانی ئاڵای (کوردستان)بوە لە کۆبونەوەکەی مەسرور بارزانی و رەجەب تەیب ئەردغان و ئەومیدیایە بڵاویکردوەتەوە ئەردۆغان لە کۆبونەوەکانی لەگەڵ بەرپرسانی هەرێمی کوردستان رێگەنادات ئاڵای کوردستان دابنرێت و مانگی رابردوش لە کاتی کۆبونەوەی نێوان ئەردۆغان و نێچیرڤان بارزانی، سەرۆکی هەرێمی  کوردستان، بەدەر لە پرۆتۆکۆڵی پێشوازیی تورکیا، ئاڵای کوردستان دانەنرابو.

1096 جار خوێندراوەتەوە