زۆرن ئەو كەسانە لەكاتی خواردنی ژەمەكانیاندا ئاو و خواردنەوەكانی دیكە لەگەڵ نانەكەدا دەخۆنەوە، ئەوەش بۆتە پرسیار لای زۆرینەى خەڵک ئایا ئەو كردارە زیان یاخود سودی هەیە.

نۆریا دینۆڤا پسپۆڕی خۆراكی و نەخۆشییەكانی كۆئەندامی هەرس ئاشكرای دەكات، ئاو و خواردنەوەكانی دیكە ئەگەر بەبڕێكی دیاریكراو بخورێنەوە زیانیان نابێت و كاریگەرییان لەسەر كرداری هەرس نابێت، بەمەرجێك لەگەڵ نانخواردندا خواردنەوەی ناتەندروست نەخورێتەوە.

ئەو پسپۆڕە لە چاوپێكەوتنێكیدا لەگەڵ كەناڵی زە فیزدای ڕوسی دەڵێت :"خواردنەوەی (200) میلیلیتر ئاو و یان خواردنەوەكانی دیكە زیانی نییە و كێشە و گرفت بۆ كرداری هەرس دروست ناكات"، بەڵام ئەگەر لەو بڕە زیاتر بخورێتەوە باش نییە و كۆئەندامی هەرس ناتوانێت بە باشی ئەركەكانی خۆی ئەنجام بدات.

سەبارەت بەو كەسانەی حەز بە خواردنەوە گەرمەكانی وەك چایى و قاوە دەكەن، ئەو پسپۆڕە باس لەوە دەكات باشترە لەگەڵ ژەمەكەدا بخورێنەوە، چونكە خواردنەوەیان دوای نانخواردن زیانی بۆ كرداری هەرس دەبێت و كەسەكە سود لەو خۆراكاكە وەرناگرێت كە خواردویەتی.