میانمار؛ کودەتا رویدا و سوپا دەسەڵاتى گرتە دەست

KNN : Kurdish News Network
09:26 - 01/02/2021
جیهان

لە میانمار کودەتاى سەربازى رویدا و سوپاى ئەو وڵاتە سەرکردەى وڵاتى  دەستگیرکرد و دەسەڵاتى گرتە دەست.

بەیانى ئەمڕۆ دووشەممە، لە وڵاتى میانمار لەلایەن سوپا و سوپاسالارى وڵاتەوە کودەتاى سەربازى ئەنجامدرا و سەرۆکى هەڵبژێردراوى ئەو وڵاتە (سان سوکى) دەستبەسەرکرا.

دواى گرتنەدەستى دەسەڵاتیش لەلایەن سوپاوە، لە بەیاننامەیەکدا هۆکارى کودەتاکەیان بۆ بونى ساختەکارى لە هەڵبژاردندا گەڕاندۆتەوە بەبێ خستنەڕوى هیچ بەڵگەیەکى ساختەکارى، کە تێیدا حیزبەکەى سان سوکى سەرکەوتنى گەورەى لە دوا هەمین هەڵبژاردن تۆمار کردبوو، بەشێوەیەکلە کۆى (476) کورسى پەرلەمان (396) کورسى بردبویەوە،

چەند رۆژێک پێشتر، جەنەراڵ زاو مین رایگەیاندبوو:، سوپا  بەپێى دەستوور یاسا جێبەجێ دەکات، ئەگەر یاسا جێبەجێ نەکرێت، دەستووریش هەڵدەوەشێتەوە و هیچ بەهایەکی نامێنێت.

ئەوە لە کاتێکدابوو، بڕیاربوو ئەمڕۆ پەرلەمانى ئەو وڵاتە یەکەمین کۆبونەوەى دەست پێبکات.

سان سوکى، تەمەنى (75) ساڵە و یەکێکە لەو ژنانەى بەشێوەیەکى چالاک لە بوارى مافى مرۆڤ کارى کردووە و خاوەنى چەندین خەڵاتى نێودەوڵەتییە و پێدەچێت لەسەر ئەو روداوەش زۆرێک لە وڵاتانى دونیا ناڕەزایەتى خۆیان پیشان بدەن، بەتایبەت ئەمەریکا و نەتەوە یەکگرتووەکانیش.

 

سەرەڕاى ئەوەى سوکى وەک چالاکوانێکى مافەکانى مرۆڤ ناسراوە، بەڵام تۆمەتبارى سەرەکى کوشتن و راگوێزانى موسوڵمانانى رۆهینگایە، کە لەسەر ئاستى دونیا و بەتایبەت موسوڵمانان کاردانەوەى زۆرى بەدواى خۆیدا هێنا.

1195 جار خوێندراوەتەوە