وەزارەتى پەروەردە خشتەى تاقیکردنەوەکانى سەرجەم قۆناغەکانى خوێندنى بڵاوکردەوە

KNN : Kurdish News Network
05:26 - 14/01/2021
کوردستان

وەزارەتى پەروەردەى حکومەتى هەرێم خشتەى بەرێوەچونى تاقیکردنەوەکانى ساڵى خوێندنى (2020 – 2021) ى سەرجەم قۆناغەکانى خوێندنى بڵاوکردەوە

بەپێى خشتەیەک کە وەزارەتى پەروەردەى حکومەتى هەرێم بڵاوى کردەوەتەوە، پرۆسەى خوێندنى پۆلە ناکۆتاکان لە قۆناغى یەک تاکو قۆناغى (11) ى خوێندنگا حکومیەکان و خوێندنى ئیسلامى رۆژى (1-3-2021) دەست پێدەکات.

 

تاقیکردنەوەى خولى یەکەمى وەرزى یەکەم رۆژى  (5-6-2021) دەستپێدەکات، ئەگەریش هەڵبژاردنى ئەنجومەنى نوێنەران عێراق ئەنجام بدرێت ئەوا دوادەخرێت بۆ رۆژى (12-6-2021).

 

رۆژى (4-9-2021) وەرزى دووەمى خوێندن دەستپێدەکات، تاقیکردنەوەى خولى یەکەمى وەرزى دووەمیش لە رۆژى (16-11-2021) دەستپێدەکات.


تاقیکردنەوەى خولى دووەمیش بۆ وەزرى یەکەم و دووەم لە رۆژى (4 -12-2021) دەستپێدەکات.


سەبارەت بە پۆلى نۆیەمى بنەرەتیش وەزارەتى پەروەردە لە خشتەکەدا ئاماژەى بۆ ئەوەکردوە، تێکراى هەڵسەنگاندنەکانى هەردوو وەرزەکە دەبێتە کۆششى ساڵانە بە رێژەى (40%) و لەگەڵ تاقیکردنەوەى وەرزى دووەمى پۆلە ناکۆتاکانیش تاقیکردنەوەى نیشتیمانى ئەنجام دەدەن بە رێژەى (60%) .

سەبارەت بە قۆناغى (12) بنەڕەتیش، وەزارەتى پەروەردە رایگەیاندوە، رۆژى (16-1-2021) دەستپێکى وەرزى یەکەمى خوێندنە، هەرەوەها رۆژى (29-3-2021) تاقیکردنەوەى وەرزى یەکەم دەستپێدەکات.

 

رۆژى ( 10-4-2021) وەرزى دووەمى خوێندن دەستپێدەکات، رۆژى (19-6-2021) تاقیکردنەوەى وەرزى دووەم دەستپێدەکات و خولى یەکەمى تاقیکردنەوە گشتیەکانیش رۆژى (25- 7-2021)  و خولى دووەمیش لە رۆژى (24-8-2021) دەستپێدەکات.

4146 جار خوێندراوەتەوە