بەپێى ئامارێکى فەرمانگەى گومرگى ئێران، عێراق لەریزبەندى پێشەوەى ئەو وڵاتانەیە کە سەوزە و میوەى ئێران بەکار دەهێنێت، بەشێوەیەک تەنها لە پێنج مانگى رابردودا عێراق بە قەبارەى (109) ملیۆن دۆلار کریارى سەوزە و میوەى ئێرانى بوە.


روحڵا لەتیفی، وتەبێژی فەرمانگەی گومرکی ئێران ئاشکرایکرد، لە (21/3/2020) تا سەرەتایى ئەم مانگە، کە دەکاتە پێنج مانگ، ئێران بە بەهاى زیاتر لە (109) ملیۆن دۆلار سەوزەو میوەی هەناردەی عێراق کردوە. 

لەتیقى قەبارەى ئەو بەروبومى سەوزە و میوانەى هەرناردەى عێراق کراو لەو پێنج مانگەدا بە زیاتر لە (95) هەزار تۆن دەخەمڵێنێت.

بەوتەى وتەبێژى فەرمانگەى گومرگى ئێران، لەدواى ئیمارات و عومان، عێراق لە پلەى سێیەمى ئەو وڵاتانەیە کە بەربومى سەوزە و میوەى ئێرانى هاوردەى وڵاتەکەى دەکات.



جگە لەم سێ وڵاتە و وڵاتانى دراوسێى، ئێران  بەروبومەکانى بۆ (37) وڵاتى جیهان دەنێرێت، لەوانە بەریتانیا و ئەڵمانیا و نەرویج و پۆڵەندا و روسیا، ئەمەش بەوتەى فەتحوڵا لەتیفى وتەبێژى فەرمانگەى گومرگى.