وێستگەی کارەبای خەبات بەگەڕخرا و وەزیرى کارەباى هەرێمیش رایدەگەیەنێت، وێستگەکە  بڕی (300) مێگاوات کارەبا بەرهەمدەهێنێت و لە (10%)ى کارەباى نیشتیمانى هەرێم دابین دەکات.

پێشنیوەڕۆى ئەمڕۆ سێشەممە (14/7/2020) رێوڕەسمى بەگەڕخستنى وێستگەى کارەباى هەڵمى خەبات بەڕێوەچوو، کە توانای بەرهەمهێنانی (300) مێگاوات کارەبا هەیە و لە قۆناغی یەکەمدا بڕی (150) مێگاوات کارەبای خستە سەر تۆڕی کارەبای نیشتیمانی.

کەمال محەمەد وەزیری کارەبای هەرێمی کوردستان رایگەیاند، وێستگەکە یەکێکە لە گرنگترین پڕۆژەکانی بەرهەمهێنانی کارەبا، وتیشى؛ هەفتەیەکە یەکەیەکی کەوتەوەتە کار و هەفتەی داهاتو یەکەی دوەمی دەکەوێتەکار کە هەر یەکەیەکی (150) مێگاوات کارەبا بەرهەمدەهێنێت و بە بڕى (564) ملیۆن دۆلار پڕۆژەکە جێبەجێکراوە.

ئاماژەى بەوەشکرد، لە ئێستادا لە هەرێمى کوردستان (2700 – 3000) مێگاوات کارەبا بەرهەمدەهێنرێت و وێستگەى خەباتیش دەتوانێت بەو بڕە کارەبایەى بەرهەمى دەهێنێت (10%)ی کارەبای نیشتیمانیی دابین بکات.