رێکخەرى ژورى رۆژنامەوانى بزوتنەوەى گۆڕان رایدەگەیەنێت، بنەماى بەشداریکردنى بزوتنەوەى گۆڕان لە حکومەتدا چاکسازیە، دەشڵێت: بە ئاشکرا بە یەکێتى و پارتیمان وتوە ئەگەر باسى چاکسازى دەکەن سەرەتا چاکسازى لە خۆتانەوە دەست پێبکەن و بەرپرسیارێتى سەرەکى چاککردنى ئەو دۆخە لە ئەستۆى ئێوەیە.

 
 لە چاوپێکەوتنێکدا لەگەڵ دیجیتاڵ میدیاى (KNN) کە کاتژمێر (9)ى ئەمشەو بڵاودەکرێتەوە، دلێر عەبدولخاق رێکخەرى ژورى رۆژنامەوانى بزوتنەوەى گۆڕان و ئەندامى جڤاتى نیشتیمانى رایدەگەیەنێت، پێداگرى دەکەین لەوەى کە پێوستە چاکسازى لە داهات و نەوت و غازى هەرێم و خاڵە سنوریەکاندا بکرێت و قۆرخکارى لە بازاڕدا بوەستێنرێت.

 لەبارەى قەیرانەکانى ئێستاى هەرێم و خراپى دۆخى هاوڵاتیان، رایگەیاند، لە دروستبونى بزوتنەوەى گۆڕانەوە و لە قۆناغى ئۆپۆزسیۆن بووندا، مەترسیەکانى ئەم رۆژانەمان راگەیاندوە و بە پڕۆژە و پاکێج هەموى خراوەتەڕوو، کە سەرجەمیان پەیوەستە بە چاکسازی کردن و نەمانى گەندەڵى.

 

 دلێر عەبدولخالق وتیشى؛ "ئێمە کە بەشداری حکومەتمان کردوە، بۆ ئەوە بەشداریمان نەکردوە کە چاوپۆشى لە هەڵە و کەموکورتیەکان بکەین، بەڵکو بەشداریکردنەکەمان لە پێناو جێبەجێکردنى چاکسازى بووە".

 

 هاوکات دەپرسێت و دەڵێت: هۆکار چییە کۆمپانیا گەورەکانى نزیک لە یەکێتى و پارتى کە بەشێکى زۆرى بە نایاسایى و بە خراپ بەکارهێنانى دەسەڵات دەوڵەمەندبوون لە باج بەخشراون.

 

 لەبارەى پەیوەندیەکانیان لەگەڵ هەریەکە لە یەکگرتوى ئیسلامى کوردستان و کۆمەڵى ئیسلامى کوردستان، رێکخەرى ژورى رۆژنامەوانى بزوتنەوەى گۆڕان دەڵێت: "ئەزمونێکى سەرکەوتوى کارکردنمان لە قۆناغى پێشوتردا هەیە، بۆیە ئەوانیش وەک دوو هێزى نیشتیمانى بەرپرسیار کە خەمى ئەزمونى سیاسى هەرێمى کوردستان و قەوارەى هەرێمى کوردستانیانە؛ بە خەم پرۆسەى چاکسازیەوەن، ئەوەش بۆ ئێمە گرنگە کە دۆستەکانى چاکسازى زیادبکات، چونکە ئێمە بۆ خزمەتى خەڵک لە حکومەتداین".

 

سلێمانى / بڕیار نامیق

549 جار خوێندراوەتەوە