هەریەکە لە سەرۆکانى روسیا و تورکیا و ئێران لەسەر پاراستنى سەروەرى و یەکپارچەیى خاکى سوریا رێککەوتن و سەپاندنى هەر گۆرانکارییەک لە نەخشەى سیاسى و جوگرافى لەو وڵاتە رەتدەکەنەوە.

 ئەمڕۆ (1/7/2020) هەریەکە لە فلادیمێرپوتین سەرۆکى روسیا و حەسەن رۆحانى سەرۆککۆمارى ئێران و رەجەب تەیب ئەردۆغانى سەرۆکى تورکیا لەبارەى دۆخى ئێستاى سوریا و ناوچەکەوە کۆبوونەوە و لە کۆتایى کۆبونەوەکەشدا بەیانێکى هاوبەشیان راگەیاند.

لەبەیاننامەکەى سەرۆکى وڵاتانى روسیاو ئێران و تورکیادا هاتووە، هەر پلانێک بۆ جیاکردنەوەى بەشێک لە خاکى سوریا رەتدەکەنەوە و بە شکاندنى سەروەرى وڵاتى سوریا و هەڕەشە بۆسەر ئاسایشى نەتەوەى ئەو وڵاتە دادەنرێت.

ئاماژە بەوەشکراوە، رەوشى ئێستاى سوریا پێویستە بە گفتوگۆ هێوربکرێتەوە و سەقامگیرى سوریا بۆ وڵاتانى دراوسێ گرنگە، جەختیشیان لە هاوکاریکردنى حکومەتى دیمەشق کردەوە و پەیوەندییە ئابورى و سیاسیەکانیان لە گەڵ دەسەڵاتدارانى سوریا وەک خاڵى هاوبەشى نێوان هەرسێ وڵات ناوبرد.

سەرۆکى ئەو سێ وڵاتە راشیانگەیاندووە، کاردەکەن بۆ گەڕانەوەى ئاوارەکانى سوریا لە وڵاتانى دراوسێ و هاوکاریکردنیان بۆ دووبارە بونیاتنانەوەى ئەو شوێنانەى بە هۆى شەڕى نێوخۆیى و ناوچەییەوە وێران بوون، بەڵێنى ئەوەشیاندا، لە داهاتوودا دانیشتنێکى سێ قۆڵى لە تاران ئەنجامبدەن.