شارەزایانی کەشناسی پێشبینی پایزێکی سارد و پڕباران بۆ هەرێمی کوردستان دەکەن و یەکەم شەپۆلی بارانبارینیش لە سەرەتای مانگی داهاتوودا دەست پێدەکات، هاوکات کەشناسیی هەرێم پێشبینییەکانی کەشوهەوای 48 کاتژمێری داهاتووی بڵاوکردەوە و پلەکانی گەرما دادەبەزن.

پشتیوان پێنجوێنی، شارەزای بواری کەشناسی ڕایگەیاند، ناوچەکانی هەرێمی کوردستان لە چاوەڕوانی پایزێکی پڕ باران و سارددان، هۆشداریشی دا لە ئەگەری دروستبوونی لافاو و بارینی تەرزەی بەهێز لە چەند ناوچەیەکی جیاجیادا.
 لەلایەکی دیکەوە، ئاراس جەبار، شارەزای کەشناسی، پاڵپشت بە وێنەکانی مانگە دەستکردەکان پێشبینی دەکات، لە نێوان 1 بۆ 5ی مانگی تشرینی یەکەم (مانگی 10) یەکەم شەپۆلی بارانبارین ناوچەکە بگرێتەوە.

سەبارەت بە کەشوهەوای ڕۆژانەش، بەڕێوەبەرایەتیی گشتیی کەشناسی و بومەلەرزەزانیی هەرێم بڵاویکردەوە، ئەمڕۆ یەکشەممە، ئاسمان ساماڵ دەبێت و پلەکانی گەرما لە ناوەڕاست و باکووری هەرێم کەمێک نزم دەبنەوە، هەروەها لە ڕۆژهەڵاتی هەرێم بەراورد بە دوێنێ (2 بۆ 3) پلە نزم دەبنەوە. خێرایی با لەسەرخۆ بۆ مامناوەند دەبێت (10-20 کم/ک) و مەودای بینین لە نێوان 9 بۆ 10 کیلۆمەتردا دەبێت.

کەشناسیی هەرێم ئاماژەی بەوەشکردووە، سبەینێ دووشەممە، ئاسمان پەڵەهەور بۆ نیمچەهەور دەبێت و لە ناوچە شاخاوییەکانی باکوور هەندێک کات دەگۆڕێت بۆ هەوری تەواو. پلەکانی گەرماش بەراورد بە ئەمڕۆ یەک بۆ دوو پلە بەرز دەبنەوە.