عێراق.. ئەو پزیشک و کارمەندەى بە کۆرۆنا بمرێت بە موچەى تەواوى خۆى خانەنشینى بۆ دەبڕدرێتەوە

06:44 - 29/06/2020
عێراق

بۆ روبەروبوونەوەى قەیرانى کۆرۆنا و لەپێناو پاراستنى تەندروستى گشتى حکومەتى عێراق چەند بڕیارێکى نوێى دەکرد و رایگەیاند، هەر پزیشک و کارمەندێکى تەندروستى توشى کۆرۆنا ببێت و گیان لەدەستبدات، بە موچەى تەواوى خۆی خانەنشینى بۆ کەس و کارى دەبڕدرێتەوە.

 

 حکومەت بڕیاریشیدا، قەدەغەى هاتوچۆ لە کاتژمێر(7)ى ئێوارەوە بۆ(6)ى بەیانى جێبەجێ بکرێت و بودجەى پێویستیش بۆ وەزارەتى تەندروستى خەرج بکرێت.

 

لە کۆبوونەوەى ئەمڕۆى ئەنجومەنى وەزیرانى عێراقدا سەبارەت ڕێوشوێنەکانى روبەڕوبوونەوەى ڤایرۆسى کۆرۆنا، حکومەتى عێراق بڕیاریدا، ڕێگە بە هاتنە ناوەوەى ئۆکسجین لە خاڵە سنورییەکانەوە بدرێت و ڕێگەش بە ژمارەیەک لە تاقیگە ئەهلییە باوەڕپێکراوەکان بدرێت پشکنینى کۆرۆنا ئەنجام بدەن.

 

حکومەتى عێراق، وەزارەتى ناوخۆ و کارمەندانى پۆلیس و هێزە ئەمنییەکانیشى راسپاردووە، ڕێنماییەکانى قەدەغەى هاتوچۆ جێبەجێ بکەن و لە ئەرکەکانیان کەمتەرخەمى نەکەن.

298 جار خوێندراوەتەوە