لە بەغدا خۆپیشادان بۆ پشتیوانى لە رێکارەکانى حکومەت بەرامبەر کەتائیبى حیزبوڵا ئەنجامدرا و خۆپیشاندەران داوا دەکەن سوپا روبەڕوى گروپە چەکدارەکان ببێتەوە.

پێشنیوەڕۆى ئەمڕۆ شەممە (27/6/2020) سەدان خۆپیشاندەر لە گۆڕەپانی تەحریر لە ناوەڕاستی بەغدا گردبوونەوە و پاڵپشتی خۆیان لەو رێوشوێنانە نیشاندا كە حكومەتی عێراق دژبە كەتائیبى حیزبوڵا گرتووەتەبەر.

خۆپیشاندەران رایدەگەیەنن، پێویستە هێزەكانی سوپا روبەڕوی سەرجەم ئەو گروپە چەكدارانە ببنەوە، كە سۆز و پاڵپشتییان بۆ لایەنەکانى دەرەوەى عێراق هەیە.

ئاماژە بەوەش دەکەن، لە کاتێکدا ئەو گروپە چەکدارانە بەشێکى زۆریان سەر بە حەشدى شەعبین و موچە لە حکومەتى عێراق وەردەگرن، بەڵام خزمەت بە بەرژەوەندی وڵاتانی دیكە دەكەن.

درەنگانى شەوى پێنجشەممە، هێزێكی سەر بە دژەتیرۆر هەڵیكوتایە سەر بارەگایەكی كەتائیبى حیزبوڵای عێراق و فەرماندەی ئۆپەراسیۆنە هاوبەشەکانیش لە راگەیەندراوێکدا ئاماژەی بەوەکرد، زانیاری هەواڵگری وردیان هەبوە لەسەر ئەو کەسانەى ناوچەی سەوز دەکەنە ئامانج  بۆیە دەستگیرکراون.