ئەمڕۆ هەینى(5/6/2020) نرخى یەک بەرمیل نەوتى برێنت (42) دۆلارى تێپەڕاند.

 دواى ئەوەى ئەندامانى رێکخراوى ئۆپیک رێککەوتن لەسەر ئەنجامدانى کۆبوونەوەیەک بە مەبەستى کەمکردنەوەى فرۆش و بەرهەمهێنانى نەوت، ئەمڕۆ بە رێژەى %3 نرخى نەوت بەرز بووە و یەک بەرمیل نەوتى برێنت گەیشتە (42) دۆلار و (12) سەنت و یەک بەرمیل نەوتى خاوى ئەمەریکیش بۆ (39) دۆلار و (11) سەنت بەرز بووەوە.

بەرز بوونەوەى نرخى نەوت لەکاتێکدایە، لە دوو مانگى رابردوودا بە هۆى قەیرانى بڵاوبوونەوەى ڤایرۆسى کۆرۆنا و ئاڵۆزییەکانى نێوان وڵاتانى بەرهەمهێن و بەتایبەت گرژییەکانى نێوان مۆسکۆ و ریاز نرخى نەوت بۆ خوار (20) دۆلار دابەزى.

بڕیارە لەم هەفتەیەدا وڵاتانى بەرهەمهێنى نەوت و ئەندام لە رێکخراوى ئۆپیک کۆببنەوە و دووبارە لەسەر کەمکردنەوەى بەرهەمهێنان و خستنەبازاڕى نەوت رێکبکەون، ئەوەش خواستى لەسەر نەوت زیادکرد و نرخەکەى بەرز کردووەتەوە.