ئەمڕۆ پەرلەمانى عێراق پرۆژە بڕیارێکى پەسەند
کرد کە تێیدا حکومەت ناچار کراوە هەتا (30) حوزەیران پرۆژەیاساى بودجە ئامادە بکات
و رەوانەى پەرلەمانى بکات.
میدیا عێراقییەکان بڵاویانکردەوە، پەرلەمانى عێراق
لەدانیشتنى ئەمڕۆیدا بڕیایداوە، دوا مۆڵەت بۆ حکومەت بۆ ناردنى پرۆژە یاساى بودجەى
ساڵى (2020)، ڕۆژى (30)ى حوزەیرانى ئەمساڵ بێت و پێویستە پێش کۆتایی هاتنى ئەو
وادەیە پرۆژەیاساکە رەوانەى پەرلەمان کرابێت.
ئاماژە بەوەشکراوە، محەممەد حەلبوسى سەرۆکى پەرلەمان،
سکرتێرى پەرلەمانى راسپاردووە سەبارەت بە ئامادەکردن و ناردنى پرۆژەیاساى بودجە گفتوگۆ
لەگەڵ سکرتێرى ئەنجومەنى وەزیران بکات.
ئەوەش لەکاتێکدایە، ناردنى پرۆژە یاساى
بودجەى ئەمساڵى عێراق بەهۆى خۆپیشاندانەکان و دەستلەکارکێشانەوەى حکومەتەکەى
عەبدولمەهدى چەند مانگێکە دواکەوتووە و ئێستا پەرلەمان چاوەڕوانى ناردنى
پرۆژەیاساکەیە بۆ دەنگ پێدان و پەسەندکردنى.
313 جار خوێندراوەتەوە