رەمەزان چ كاریگەرییەك لەسەر پێست و قژ دروست دەكات

09:22 - 14/05/2020
تەندروستی

بەرزبونەوەی پلەكانی گەرما بەراورد بە وەرزی زستان و نەخواردنی هیچ جۆرە خۆراكێك لە رۆژانی مانگی رەمەزاندا، كاریگەری لەسەر پێست و قژ دروست دەكات و بەرەو وشكبونەوەیان دەبات و ئەگەری توشبوونی بە چەند كێشەیەكی تەندروستی زیاد دەكات، بۆ پاراستنی قژ و پێستیش لەو كێشانە پێویستە لە رەمەزاندا و دوای كۆتایی هاتنی مانگەكەش پەیڕەوی چەند رێنماییەك بكرێت.

پسپۆڕانی خۆراكی باس لە كاریگەری جۆری خۆراكەكان دەكەن و داوا لە هاوڵاتیان دەكەن ئەو خۆراكانەی لە ژەمی بەربانگدا دەیخۆن، قورس و چەور نەبن، بەڵكو باشترە گرنگی بە خواردنی هەمەچشن و جۆراوجۆر بدەن، سەوزەكان لە پێكهاتەی ژەمەكەدا هەبێت، هەروەها بەهۆی ئەوەی لە ڕۆژدا هیچ جۆرە ئاو و شلەمەنییەك ناخورێتەوە، بۆیە خواردنەوەی چەند پەرداخێك ئاو زۆر گرنگە بۆ پێست و لە ئەگەری وشكبونەوە دەیپارێزێت.

دەربارەى خواردنی ژەمی پارشێو، پسپۆڕە خۆراكیەكان داوا لە هاوڵاتیان دەكەن، گرنگی بە خواردنی سەوزە و میوە و نانی جۆ و شیرەمەنییەكان بدەن، چونكە ئەو خواردنانە گرنگییان بۆ پێست هەیە و بە شێوەیەكی جوانتر دەریدەخەن.

بەڕۆژوبوون كاریگەری لەسەر قژیش دەبێت و پسپۆڕەكان بۆ كەمكردنەوەی ئەو كاریگەرییانەش رێنمایی ئەوە دەدەن، كە باشترە لەژەمەكانی بەربانگ و پارشێودا گرنگی بە خواردنی سەوزە و میوە و چەند خۆراكێكی دیكەی وەك پاقلەمەنی و شیرەمەنی و چەرەساتەكان بدرێت، چونكە پێكهاتەی ئەو خواردنانە دەوڵەمەندن بە چەندین جۆری ڤیتامین و خوێی كانزایی كە سودیان بۆ قژ هەیە و تاڵەكانی بەهێز دەكەن.

دوای كۆتایی هاتنی مانگی ڕەمەزانیش، پێویستە گرنگیدان بە جۆری خواردنەكان بۆ تەندروست راگرتنی پێست و قژ بەردەوام بێت، بۆ ئەوەی ئەگەر لە بەڕۆژوبووندا كاریگەرییەكی خراپی كردبێتە سەر پێست و قژ، دوای ئەو مانگە لەڕێی خواردنەوە ئەو كاریگەرییە كەمبكرێت.

بۆ ئەوەش پێویستە لە سێ ژەمە ئاساییەكەی ڕۆژانەدا گرنگییەكی زۆر بە خواردنی سەوزە و میوە بدرێت، بەتایبەت ئەوانەی بڕێكی زۆر ئاو لە پێكهاتەكەیاندا هەیە، هەروەها خواردنەوەی شیر و ئاو بەشێوەیەكی بەردەوام زۆر گرنگە بۆ شێداركردنی قژ و پێست، ئەمە جگە لە گرنگی بەركارهێنانی ماسك و كرێمە تایبەتەكان بە تایبەت جۆرە سروشتییەكان، ئەمەش وادەكات قژ و پێست جوانتر و سەرنجڕاكێشتر دەربكەوێت.

207 جار خوێندراوەتەوە