ئەمەریكا پێشوازی لە پێكھێنانی كابینەی نوێی حكوومەتی عێراق دەكات و 120 رۆژی دیكەشی وەك مۆڵەت دایە عێراق بۆ مامەڵەكردن لەگەڵ ئێران.

 
وەزارەتی دەرەوەی ئەمەریكا لە راگەیاندراوێكدا ئاماژەی بۆ ئەوەکردووە، مایك پۆمپێیۆ وەزیری دەرەوەی ئەمەریكا و مستەفا كازمی سەرۆك وەزیرانی نوێی عێراق، پەیوەندییەكی تەلەفۆنییان ئەنجامداوە، لە پەیوەندییە تەلەفۆنییەكەدا ئەمەریكا پێشوازی لە پێكھێنانی كابینەی نوێی حكوومەتی عێراق كردووە و پاڵپشتیشی بۆ كازمی دووپاتكردووەتەوە.

باسی لەوەشکردوە، وەك پێدانی دەرفەتێك بۆ سەركەوتنی كابینەكە، ئەمەریكا 120 رۆژی دیكەی مۆڵەت بەخشیوەتە حكومەتی عێراق، بۆ مامەڵەكردن لەگەڵ ئێران و ھاوردەكردنی كارەبا و گازی سرووشتی لەو وڵاتە، ئەوەش دوای ئەوەی هەفتەی ڕابردوو ئەو وڵاتە ڕایگەیاند بۆ جاری کۆتایی مانگێکی دیکە مۆڵەتی مامەڵەکردنی عێراق و ئێرانیان درێژ کردۆتەوە.

دوای زیاتر لە پێنج مانگ ناکۆکی نێوان لایەنە سیاسییەکان بۆ پێکهێنانی حکومەتی نوێی عێراق شەوی ڕابردوو، پەرلەمانی عێراق لە دانیشتنێکی نائاساییدا متمانەی بەخشیە کابینە وەزارییەکەی مستەفا کازمی.