بەشێكی ڕۆژوەوانان لەگەڵ ئەوەی لەم مانگەدا تەنها دوو ژەم نان دەخۆن، لەگەڵ ئەوەشدا بڕێكی زۆری خواردن ناخۆن، بەڵام ڕەمەزان كاریگەری لەسەر كێشی لەشیان دەبێت و چەند كیلۆیەك زیادە دەكات.

پسپۆڕانی تەندروستی ئاشكرای دەكەن، چەند هۆكارێك هەیە وادەكات كەسێك لەڕەمەزاندا كێشی لەشی زیاد بكات، ئەوانیش بریتین لە:

1-   جوڵەی كەم: بەشێكی ڕۆژوەوانان هەرچەندە بڕێكی كەم خواردن دەخۆن، بەڵام لەدوای بەربانگ تا كاتی پارشێو كەمترین جوڵەیان هەیە، ئەوەش هۆكارێكە بۆ زیادبونی كێشی لەش.

2-   جۆری خواردنەكان: بەشێكی ئەو خۆراكانەی لە ڕەمەزاندا ئامادە دەكرێت، چەوری و شیرینییەكی زۆر لە پێكهاتەكەیاندایە، بۆیە ئەگەر بە بڕی كەمیش بخورێن كاریگەریان لەسەر زیادبونی كێشی لەش دەبێت.

3-   ڕێكخستنی جۆری خواردنەكان: پسپۆڕانی تەندروستی داوا دەكەن دوای شكاندنی ڕۆژو سەرەتا ئەو خۆراكانە بخورێت كە كالۆرییەكی كەم لە پێكهاتەكەیاندا هەیە، وەك شۆربا و زەڵاتە، بەڵام ئەگەر ژەمەكە بە خواردنی قورس و چەور دەستپێبكات تەنانەت ئەگەر بڕێكی كەمیش بێت، دەبێتە هۆی زیادبونی كێشی لەش.

4-   خواردنەوەی شەربەت: زۆر كەس بۆ كەمكردنەوەی هەستی تینوێتی شەربەت دەخواتەوە، كە كالۆرییەكی زۆری تێدایە و چەند گرامێك بۆ كێشی لەش زیاد دەكات.

5-   كەم ئاو خواردنەوە: كاریگەری لەسەر كەمكردنەوەی سوتاندنی چەوری لەش و بڕی ئەو خواردنە دەبێت كە كەسێك دەیخوات.

6-   كەمخواردنی میوە: زۆر كەس لە ڕەمەزاناندا خواردنی میوە پشتگوێ دەخات، ئەوەش كاریگەری لەسەر كێشی لەش دەبێت.

7-   زۆر خواردنی چەرەساتەكان و میوەی وشك: بەشێوەیەكی گشتی خواردنی میوەی وشك و چەرەساتەكان سودیان بۆ تەندروستی هەیە، بەڵام ئەگەری زیاد لە بڕی پێویست بخورێن سودەكەیان دەگۆڕێت بۆ زیان و هۆكار دەبن بۆ زیادبونی كێشی لەش.

8-   خواردنە سوێرەكان لەشێوەیەكی گشتی دەبنە هۆی زیادكردنی كێشی لەش.

9-   خواردنی خۆراكی چەور و شیرین لە ژەمی پارشێودا.