چەند هەنگاوێكی ئاسان بۆ ڕزگاربوون لە ماندوویەتى لە مانگی ڕەمەزاندا

03:01 - 01/05/2020
هەمەڕەنگ

بەشێكی ڕۆژوەوانان لە ڕۆژانی مانگی ڕەمەزاندا هەستی تەمەڵیی ‌و كەم توانایی بەسەریاندا زاڵدەبێت ‌و لە هەندێك حاڵەتدا كاریگەرییەكەی بەجۆرێك دەبێت ناتوانن كاروباری ڕۆژانەیان راپەڕێنن.

پسپۆڕانی تەندروستی چەند ڕێگایەكی ئاسانیان دیارییكردووە، كە لە ڕێیەوە دەتوانیت كۆنتڕۆڵی ئەو حاڵەتە بكەیت بەبێ ئەوەی كاریگەریی نەرێنی لەسەر كارەكانت هەبێت ‌و تووشی بێزاریت بكەن.

ڕێنماییەكان بریتین لە:

 1/ شۆردنی دەموچاو دوای لە خەوهەڵسان بە ئاوی سارد، چونكە ئەو جۆرە ئاوە وریاكەرەوەیە و چالاكیت پێدەبەخشێت ‌و وات لێدەكات كارەكانت بە ڕێكیی ئەنجام بدەیت.

2/ كەمخەویی دەبێتەهۆی ماندوبوونی جەستە ‌و لەش داهێزران، بۆیە هەوڵبدە ڕۆژانە كاتی خەوتنت گونجاو بێت ‌و نزیكەی هەشت كاتژمێر بێت.

3/ جۆری ئەو خواردنانەی دەیخۆیت كاریگەریی لەسەر وزەو چالاكییەكانت هەیە، بۆیە دەبێت دوور بكەویتەوە لە خواردنە چەور و قورسەكان ‌و خواردنە سورەوەكراوەكان، بەتایبەت لە ژەمی پارشێودا، چونكە ئەو ژەمە كاریگەریی لەسەر چالاكییەكانی مرۆڤ هەیە و هۆكارە بۆ هەستكردن بە ماندوێتی ‌و تەمەڵی.

4/ جوڵەی زۆر پاڵ بە بڕێكی زۆری خوێنەوە دەنێت بۆ ئەندامەكانی لەش، بەوەش مرۆڤ چالاكتر دەبێت ‌و هەست بە لاوازیی‌ و كەمتوانایی ناكات، بۆنمونە؛ ئەگەر شوێنی كار یان ماڵەكەت لە نهۆمەكانی سەرەوەی بینایەكە باشترە لە بری ئاسانسوار قادرمەكان بەكاربهێنیت.

5/ ئەنجامدانی ڕاهێنانە وەرزشییەكان بەتایبەت ڕۆیشتن بەپێ، یەكێكە لە ڕێگا خێراكان بۆ بەخشینی وزە بە جەستە.

6/ پلاندانان بۆ چۆنیەتی ڕێكخستنی كاتەكانت لە ڕۆژانی ڕەمەزاندا یارمەتیدەر دەبێت بۆ ئەوەی زاڵبیت بەسەر تەمەڵیداو كاروبارەكانت لەكاتی خۆیدا ڕاپەڕێنیت.

7/ ئاو خواردنەوە لە ماوەی نێوان بەربانگ تا پارشێو زۆر گرنگە و كاریگەریی لەسەر چالاكییەكانی ڕۆژی داهاتووت دەبێت، بۆیە پێویستە هەركەسێك لە نێوان بەربانگ ‌و پارشێودا زیاتر لە 8 پەرداخ ئاو بخواتەوە.

8/ گرنگیدان بە خواردن ‌و خواردنەوەی ئەو خۆراكانەی دەوڵەمەندن بە ڤیتامین ‌و ماددە ڕیشاڵییەكان بە تایبەت بۆ ژەمی پارشێو، چونكە ئەو خۆراكانە یارمەتی چالاككردنی مێشك دەدەن بۆ زاڵبوون بەسەر لاوازی ‌و تەمەڵیی، دیارترین ئەو خۆراكانەش بریتین لە؛ شیر، سێو، مۆز، شەربەتی پرتەقاڵ ‌و لیمۆ.

661 جار خوێندراوەتەوە