چەند سودێكی باوەڕ پێنەكراوی كۆرۆنا كە چەندین ساڵە جیهان بەدوایدا وێڵە

12:32 - 28/03/2020
هەمەڕەنگ

 پێدەچێت 2020 ببێتە خاوێنترین ساڵ بۆ مرۆڤایەتی بەو پێیەی بڵاوبونەوەی ڤایرۆسی كۆرۆنا بووە دەرفەتێك بۆ گرنگیدانی زیاتر بە پاكوخاوێنی كە لەكاتەكانی دیكەدا بەو شێوەیە نەبوبووە جێی بایەخ، بێ گومان ئەو بایەخ تەنها بۆ كەسەكان نەبووە بەڵكو مرۆڤ بەركەوتنی لەگەڵ هەر شوێنێكدا هەبێت، لەم كاتەدا هەولێ پاكردنەوەی داوە.

 

 
چین كە سەرچاوەی سەرهەڵدانی ڤایرۆسەكەیە، خاوەنی زۆرترین ژمارەی دانیشتوانە، یەكێكە لەو هەواكەی زۆرترین ڕێژەی پیسبونی هەیە و زۆرترین بڕ و جۆری گازە جیاوازەكان دەخاتە بەرگە هەوای زەوییەوە، ئەوەش كاریگەری لەسەر ژینگەی وڵاتەكە و جیهانیش دروست كردووە.

 

 

ڕاگەیاندنی قەدەغەی هاتوچۆ لە چین كاریگەری تەواوی لەسەر كەمبونەوەی ڕێژەی ئەو پیسبونە هەبووە، بەپێی چەند وێنەیەكیش كە لە مانگە دەستكردەكانەوە گیراون، ئاسمانی چین خاوێنتر دەردەكەوێت و پیسبوون بەڕێژەیەكی بەرچاو كەمی كردووە.
وەزارەتی ژینگەی چین دەڵێت "كوالیتی هەوا لە وڵاتەكە بەڕێژەی 21.5 % بەرەوباشتر چووە، ئەوەش بەهۆی وەستانی كارگەكان و گەشتی فڕۆكەكان".

 

 

ئیتاڵیش كە بڵاوبونەوەی ڤایرۆسەكە تەنگی پێهەڵچنیوە و ژمارەی قوربانیانی پێش چین كەوتووە، ژینگەكەی سودی لە كۆرۆنا وەرگرتووە، بەجۆرێك سەرچاوەكانی ئاوی شاری ڤینیسیا بەتەواوی پاك بونەتەوە بەڕادەیەك دەتوانرێت ماسییە بچوكەكان بە چاو ببینرێن، هەروەها وێنەی تەلار و خانووەكان لەسەر ڕووی ئاوەكە دەربكەون، ئەوانەش پێشتر بینینیان مەحاڵ بووە، ئەمە جگە لەوەی زۆرینەی شوێنە مێژووی سەرنج ڕاكێشەكانیش بەهۆی نەبونی گەشتیارەوە بە خاوێنی ماونەتەوە.

 

 

لە ئەمریكا ڕۆشین كۆمان كە توێژەرێكی زانكۆی كۆڵۆمبیای ئەمریكایە ڕایگەیاندووە ئەو پشكنینانەی بۆ هەوای نیویۆرك كراون، گۆرانكارییەكی زۆری لە كوالیتی هەوای شارەكەدا دەرخستووە، ئەوەش بەراورد بە ساڵی ڕابردوو.

كۆمان دەڵێت " چەند پێوەرێكمان هەیە كە ڕێژەی گازی دووەم ئۆكسیدی كاربۆن و گازە ژەهراوییەكانی دیكەی هەوای پێ پێوانە دەكەین، دەتوانم بڵێم ئەوانەی لەم ماوەیەدا وەرمانگرتووە خاوێنرترین كە بینیومە".

 

 

لای خۆیەوە سێرگی ئیڤانۆڤ نوێنەری تایبەتی سەرۆكی ڕوسیا بۆ كاروباری ژینگە باسی لەوە كردووە، دوای بڵاوبونەوەی كۆرۆنا دۆخی ژینگەی تەواوی جیهان زۆر بەرەو باشتر چووە، چونكە بەشێكی زۆری كارگە گەورە و پیشەسازییەكان وەستاون كە دەبونە هۆی پیسكردنی هەواو ژینگە جیاوازەكانی دیكە.


3256 جار خوێندراوەتەوە