یانەی بەرشەلۆنە ڤالڤێردی لە ئەركەكەی دوورخستەوە و كیكی ستینی لە شوێنی دانا

09:32 - 14/01/2020
وەرزش

یانەی بەرشەلۆنە لە بەیاننامەیەكدا دوورخستنەوەی ئەرنستۆ ڤالڤێردی راهێنەری یانەكەی راگەیاند و سوپاسی كارەكانیشی لە یانەكە كرد. 

 
یانەی بەرشەلۆنە لە بەیاننامەكەیدا ئاشكراشیكردوە، كیكی ستینی تەمەن 61 ساڵ لە شوێنی ڤالڤێری دەبێتە راهێنەری نوێی یانەكە و دوانیوەڕۆی ئەمڕۆش لە كۆنگرەیەكی رۆژنامەوانیدا گرێبەستەكەی لەگەڵ یانەی بەرشەلۆنە ئیمزا دەكات كە تاكو 30 حوزەیرانی 2022 بەردەوام دەبێت. 

 

كیكی ستین ساڵی رابردوو راهێنەری یانەی ریاڵ بیتس بوو، دوای بەدەستهێنانی پلەی دەیەم بۆ یانەكەی، بەشێوەی خۆویستانە دەستی لە ئەركی راهێنەرایەتی یانەكە هەڵگرت. 

 

دوورخستنەوەی ڤالڤێردی لە دوای ئەوەهات شەوی چوار شەممە لە یاری پێش كۆتایی جامی سوپەری ئیسپانیا كە لە وڵاتی سعودیە بەڕێوەچوو، یانەی بەرشەلۆنە بە ئەنجامی 2 بە 3 بە یانەی ئەتلەتیكۆ مەدرید دۆڕا، ئەوەش ناڕەزایی زۆری هاندەرانی بەرشەلۆنەی بەدوای خۆیدا هێنا و داوای لە دەستەی كارگێری یانەكە كرد لەكارەكەی دووری بخەنەوە.

 

ئەوەش لە دوای چەند دۆڕانێكی مێژوویی یانە كەتەلۆنییەكە لەسەردەمی ڤالڤێردیدا، كە دیارترینیان دۆڕان بوو بە یانەی لیڤەرپوڵ بە ئەنجامی 0 بە 4 و لە وەرزی رابردووی خولی یانە پاڵەوانەكانی ئەوروپا، بەر لەوەش بە ئەنجامی 0 بە 3 بە یانەی رۆمای ئیتاڵی دۆڕا. 

451 جار خوێندراوەتەوە