هەڵمەتی كوتان 248 هەزار منداڵ لە سلێمانی ‌و هەڵەبجە دەگرێتەوە

04:40 - 23/12/2018
تەندروستی

10 ساڵە لە سنوری پارێزگای سلێمانی ئیفلیجی منداڵ تۆمارنەكراوە
سلێمانی؛ هەڵمەتی كوتان بۆ منداڵانی خوار تەمەن پێنج ساڵ دەستیپێكرد


هەڵمەتی كوتانی نیشتمانی دژی نەخۆشی ئیفلیجی منداڵان, لە پارێزگاكانی سلێمانی ‌و هەڵەبجە‌و ئیدارەكانی گەرمیان ‌و راپەڕین بەڕێوەدەچێت ‌و پرۆسەكە 248 هەزار منداڵ لە سلێمانی ‌و هەڵەبجە دەگرێتەوە، ئەوەش لەكاتێكدایە لەسنوری پارێزگای سلێمانی ماوەی 10 ساڵە هیچ جۆرە نەخۆشیەكی ئیفلیجی تۆمارنەكراوە.

 499 تیمی كوتان و 109 سەرپەرشتیارو 307تیم لە 23ی مانگەوە لە پارێزگاكانی سلێمانی و هەڵەبجەو ئیدارەكانی گەرمیان ‌و ڕاپەڕین دەست بەكاربون بۆ كوتانی هەزاران منداڵ.

بریارەكە لە چوارچێوەی هەڵمەتەكەدا 248 هەزارو 392منداڵ بكوترێن.

لەسنوری پارێزگای سلێمانی ماوەی 10 ساڵە هیچ جۆرە نەخۆشیەكی ئیفلیجی تۆمارنەكراوە، بەڵام كاربەدەستانی تەندروستی دەڵێن گرنگە زیاتر ڕێگربن لەو نەخۆشیە.

هەڵمەتەكە 23ی مانگ  دەستپێدەكات و تاپێنج ڕۆژ بەردەوام دەبێت تیمەكان هەموو ناوچەكان و دەگەڕێن ‌و دەچنە كەمپی ئاوارەكانیش داواش دەكرێت هەرشوێنێك تیمەكانی پێنەگەیشت منداڵان بگەیەننە نزیكترین مەڵبەندی تەندروستی.

تەندروستی هەڵەبجەش داوا لە دایك و باوكی منداڵان دەكات كەمتەرخەم نەبن لەگەیاندنی منداڵەكانیان بۆ لای تیمەكان بۆ ئەوەی بە دڵۆپێك لە نەخۆشیەكی ترسناك دووریان بخەنەوە.

ساڵانە هەڵمەتی كوتان لەهەرێمی كوردستان بەهاوكاری ڕێكخراوی who و یونسێف ئەنجام دەدرێت، بریارە لەم هەڵمەتەدا لەسەرانسەری هەرێمی كوردستان، 797 هەزار و 482 منداڵی خوار تەمەن پێنج ساڵ بكوترێن.

355 جار خوێندراوەتەوە