لەکاتێکدا هەموو ئەو گرووپ و حیزبانەی ئۆپۆزسیۆن باش لەوە تێگەیشتوون کەزۆرینەی کۆمەڵگەی کوردی دژی ستەم و نادادیە و ناڕازییە لەم دەسەڵاتەی ئێستاکەی هەیە، بەڵام لەبەر ئەوەی خۆیان بەڕێکخستن نەکردووە، کەوتونە داوی دەسەڵات یاخود لە ئەساسدا بۆ تێکدانی شیرازەی کۆمەڵگەی کوردی و هێشتنەوەی دەسەڵاتی باشوور درووستکراون یاخود لەدەرەوەی هەرێم بە ئامانجی لێدان لە پڕۆژە نیشتمانیەکان پاڵپشتی دەکرێن، لە هەناوی کۆمەڵگەوە نەهاتونەتەدەر، بەوەش نەبوونەتە هیوایەک بۆ خەڵک و بەدوای خەمی خەڵکەوەبن، پارێزەرەی مافەکانیان بن، ئەمە وایکردووە دەسەڵات بەو هەموو هەڵەو کەمووکوڕیانەی هەیە کە لەهەر شوێنێکی دوونیا بوایە ئەم حیزبانەی دەسەڵات نەک نەدەمانەوە بەڵکو ئێستا بەشێکبوون لەمێژوو، کەچی هێشتا لەسایەی ئۆپۆزسیۆنی خۆویستی کوردی  مێژووی خۆیان دەنوسنەوە، ئەوانیش قڕووقەپ بەدیار خێری دەسەڵات و ئامۆژگاری وڵاتانی ناوچەکەوە بێدەنگیان لێکردووە، دوایش گلەی لەخەڵک دەکەن بۆچی دەنگیان پێنادەن. بۆچی دەبێت خەڵک دەنگی بسوتێنێ و بایکۆت بکات، کەتۆ نەتوانی نوێنەرایەتی ئەو بکەیت و ئاگری کوڵی دڵی دامرکێنیتەوە، ئەو ناچارە بەدڵێکی پڕ لە داغەوە بیسوتێنێ، یاخود بەدیاری هەستی ساردی ناخی کە کەس شکنابات نوێنەرایەتی بکات، لەماڵەوە دادەنیشێت و بایکۆتی دەنگدان دەکات. بۆ ئەوەی خەڵک متمانەتان پێبکات پێویستە ستڕاتیژی کارەکەتان دژایەتی ڕاستەقینەی دەسەڵاتبێت، ئەگەر ئەوە نەبێت، ئەوە بۆ هەمیشە دەبێت لەدامێنی دەسەڵاتدا گەمە بەهەستی خۆتانبکەن نەوەک گلەی لەدەنگدەر. 

هەر هێزێک لەهەناوی کۆمەڵگاوە نەیەتەدەر و دژی سیستەمی فیوداڵی نەبێت و پشگیری لە چینی چەوساوەی کۆمەڵگاکەی نەکات لەدەرەوەی هێز و دەسەڵات زوو یاندرەنگ دەچێتە مێژووەوە، بۆئەوەی ئەمە ڕوونەدات پێویستە هەموو ئەو هێزانە لەمەیدانی کاری مەدەنیدا لەشەقام جوڵەیان هەبێت، سەریان لە شاشەی مۆبایل و تیڤیەکانیان بێننەدەرەوە و بچنە گۆڕەپانی خەپات بۆ ڕووبەڕووبونەوەی داکۆکی لەمافی زەوتکراوی خەڵک، تا ئەوکاتەی لەچوارچێوەی داکۆکی کردن لەمافی خەڵک خۆیان بەڕکخستن و پەروەردە نەکەن، میدیاکان جێنەهێڵن و نەیەنە ناوخەڵک، لەگەڵ سۆزی خەڵک نەجوڵێن، ئەوە دەبێت هەر لەدامێنی دەسەڵات یاری بکەن، دەسەڵاتیش کێ بەهی خۆی نەبینێت یان یاریەکەی کۆتای هاتبێت  زیندانی و تێهەڵدانی باشی دەکەن. 

خاڵێکیتر کە پێویستە هێزەکانی ئۆپۆزسیۆن و خەڵکی کاری لەسە بکات خەڵکانی دڵسۆز و پەروەردەکراوی و دەرچوو لەقۆناغی سەختی کاری مەدەنی و سیاسی و پەروەردەکراو جێگای ئومێد بخەنە گۆڕەپانی کاری پەرلەمانی، بۆ ئەوەی بتوانن متمانەی خەڵک بەدەستبهێنن، کە بتوانێ لەبەردەم دەسەڵاتێک بوەستێتەوە بەهەموو ڕێگاکانی لێدان و دەستبردن بۆ ئابڕوو و کڕین و هەتا زیندانی و کوشتنیش تەسلیم نەبێت، هەتا ئۆپۆزسیۆن بەمرۆڤی تەسلیم بووە پەرلەمان پڕبکاتەوە هەم متمانە دەدۆڕێنێ و هەمیش لەدامێنی دەسەڵاتدەبێت، هەروەها دەبێت بەو پشکەخێرە ڕازیبێت و شانازیش بکات بەوەی پێیدەووەن. 

پێدانی ئەم پشکە خێرە بە ئۆپۆزسیۆن لەلایەن دەسەڵاتەوە مانای سەنگ و قورسایی ئۆپۆزسیۆن نییە، بەڵکو دەیەوێت لەو ڕێگایەوە پەیامی دیمووکڕاسی بەجیهان بڵێت کە هێشتا ئەوان دەتوانن نوێنەری خەڵکبن و ئەوەتاش ئۆپۆزسیۆنێکیان لەدامێنیاندا هەیە زۆر ژیر و چاوکراوەیە بۆڵەبۆڵ دەکات، خەڵکی بەخۆیەوە سەرقاڵکردووە، ئەمە پێیدەگوترێت ئۆپۆزسیۆنی دامێنی دەسەڵات.

هەمیشە دەسەڵاتیش ئەو مرۆڤە یاخیانەی بەگرتن و لێدان و شکاند  و پارە و ژن والێکردووە کە تەسلیم بە بەرنامەو کارەکانی خۆی کردوون، ئەوە هەمیشە کاری ستڕاتیجی ئەو بووە، بۆیە ڕێڕەوی کاری ئۆپۆزسیۆنی لە باشوری کوردستانی لە ڕێڕەوی ستڕاتیجیەوە گۆڕیوە بۆ تاکتیکی مانەوەی خۆی و پاراستنی بەرژەوەندیەکانی دەسەڵات، ئەوەی هەیە لە ستڕاتیجی ئۆپۆزسۆن تەنها بۆڵەبۆڵ و سەرخستنە ناوشاشەی تیڤی و مۆبایلەکانەنیانە، ئەم ئۆپۆزسیۆنە وایکردووە دەسەڵات لەسەر ستڕتیجیەتی خۆی درێژە بەکاری بێوچانی بدات و ئۆپۆزسیۆنیش خەریکی ماندوکردنی مێشکی خەڵکبێت، بەنمونە کەی کاری ئۆپۆزسیۆنە بڵێت مووچەدێت، یان نایەت، کاری ئۆپۆزسیۆن ئەوەیە دوای نەهاتنی مووچە بڕیاری ڕاگرتنی دەوام و بازاڕ بدات و داواش لەخەڵک بکات ڕێگاکان دابخات و داواش لەهێزی ئەمنیەکان  بکات خەڵک بپارێزێ، کە چی ئۆپۆزسیۆن لێرە کاری ستڕاتیجی ئەوەیە لەدەسەڵات ماندووترە تازووتربڵێت مووچە هات. 

ئاخر ئەگەر ئۆپۆزسیۆن بویستبا کۆمەڵگەیەکی تەندرووستی خاوەن شکۆدار هەبێت، ڕێگەی دەدا پەرلەمان بەوشێوەیە پەکخراوبێت، یاخود بەئارەزووی خۆی باج بسەپێنێ و زیاد بکات، بۆیە هەبوونی ئۆپۆزسیۆن لەم وڵاتە جگە لە بێهێزکردنی خەڵک و ماندووکردنی جەماوەر و پاڵپشتیکردن لەدەسەڵات شتێکی جیاوازی نەکردووە، ئەو کورسییانەی دراونەتە ئۆپۆزسیۆن هاوشێوەی کۆتاکان و ئەو کەمایەتیانەی ناو وڵات هەژماری بۆکردوون،  بۆیە هەمیشە لەدامێنی دەسەڵات ئاوازی ناخۆش دەچڕن و مێشکی خەڵک ماندوو دەکەن.