وەزارەتی بازرگانی و پیشەسازیی حکومەتی هەرێمی کوردستان، تەرخانکردنی زیاتر لە 22 ملیار دیناری بۆ شایستە داراییەکانی جووتیاران ڕاگەیاند. بەمەش کۆتایی بە دابەشکردنی پارەی ساڵی 2025 دێت و یەکەم گوژمەی ساڵی 2026 دەستپێدەکات.

سەروەر هاواری، بریکاری وەزارەتەکە بە ئاژانسی هەواڵی عێراقی ڕاگەیاندووە؛ بڕیاردراوە بە خەرجکردنی زیاتر لە 22 ملیار دینار بۆ جووتیاران، کە دوایین گوژمەی ساڵی 2025 و یەکەم گوژمەی ساڵی 2026 لەخۆدەگرێت.
بەپێی وتەی بریکارەکە، دوایین گوژمەی پارەی ساڵی 2025 بڕەکەی حەوت ملیار و 736 ملیۆن و 857 هەزار دینارە. لەو بڕەش چوار ملیار و 602 ملیۆن و 604 هەزار دینار بۆ سلێمانییە و، سێ ملیار و 134 ملیۆن و 253 هەزار دیناریش بۆ دهۆکە.

لەبارەی پشکی هەولێریشەوە ڕوونیکردووەتەوە، شایستەی جووتیارانی هەولێر بۆ ساڵی 2025 پێشتر بەتەواوی لە گوژمەی هەشتەمدا دراوە و بووەتە سفر. بە خەرجکردنی پارەی سلێمانی و دهۆکیش کۆتایی بە پارەی ئەمساڵ دەهێندرێت.

هاوکات بڕیاری خەرجکردنی یەکەم گوژمەی ساڵی 2026 بە بڕی 15 ملیار و 245 ملیۆن دینار دەرچووە. بڕەکە بەمشێوەیە دابەشکراوە: پێنج ملیار و 30 ملیۆن دینار بۆ هەولێر، پێنج ملیار و 435 ملیۆن دینار بۆ سلێمانی، هەروەها چوار ملیار و 780 ملیۆن دینار بۆ دهۆک.