بەرەبەیانی ئەمڕۆ دووشەممە، کەمپی بنەماڵەکانی کۆمەڵەی شۆڕشگێڕی زەحمەتکێشانی کوردستانی ئێران لە ناوچەی زرگوێزەڵەی سەر بە پارێزگای سلێمانی بە سێ مووشەک کرایە ئامانج و ڕووداوەکە هیچ زیانێکی گیانی لێنەکەوتووەتەوە.

عەلی رەنجبەری، بەرپرسی پەیوەندییەکانی کۆمەڵەی شۆڕشگێڕی زەحمەتکێشانی کوردستان لە ڕاگەیەندراوێکدا ئاشکرایکرد، هێرشەکە کاتژمێر 3:10 خولەکی بەرەبەیان ئەنجامدراوە، سەرەڕای لێکەوتەی مادی، بەڵام هیچ زیانێکی گیانی نەبووە و سەرجەم دانیشتووانی کەمپەکە سەلامەتن.

بەرپرسی پەیوەندییەکانی کۆمەڵەی شۆڕشگێڕ ئاماژەی بەوەشکردووە، ئەم هێرشانە لە ئەنجامی "ترس و تۆقینی" کۆماری ئیسلامیی ئێرانەوە سەرچاوەی گرتووە بەرامبەر بەو مانگرتنە گشتییەی کە بڕیارە ڕۆژی چوارشەممە (25ی خەرمانان) لە سەرانسەری کوردستان بەڕێوەبچێت.