عەبدولقادر ئوراڵئۆغڵو، وەزیری گواستنەوەی تورکیا ڕایگەیاند؛ وڵاتەکەی بەنیازە هێڵی ئاسنی مێژوویی حیجاز لە چوارچێوەی "پڕۆژەی ڕێگەی گەشەپێدان" نۆژەن بکاتەوە، ئەوەش بە ئامانجی بەهێزکردنی ڕۆڵی لە جوڵەی گواستنەوە و بازرگانی لە ناوچەکەدا.

ئەو هەنگاوەی تورکیا دوای ڕێککەوتنێک دێت کە لە مانگی حوزەیرانی ڕابردوودا لەگەڵ سعودیە واژۆی کردووە، بۆ بەهێزکردنی هەماهەنگی لە بوارەکانی گواستنەوە و خزمەتگوزارییە لۆجستییەکان. ڕێککەوتنەکە دووبارە کاراکردنەوەی هێڵی حیجاز دەگرێتەوە بۆ پشتیوانیکردن لە جوڵەی بازرگانی و گواستنەوەی نێوان تورکیا و وڵاتانی کەنداو.

مێژووی دروستکردنی هێڵی ئاسنی حیجاز دەگەڕێتەوە بۆ سەردەمی سوڵتان عەبدولحەمیدی دووەم، کە درێژییەکەی نزیکەی هەزار و 100 میل بوو لە دیمەشقەوە بۆ مەدینە، پێش ئەوەی لە کاتی جەنگی جیهانیی یەکەمدا ڕووبەڕووی وێرانکارییەکی فراوان ببێتەوە.