حکومەتی کوەیت، ئەمڕۆ یەکشەممە، دەروازەی سنووریی عەبدەلی لەگەڵ عێراق بەڕووی گەشتیاران و جموجووڵی بازرگانیدا کردەوە، ئەمەش دوای ئەوەی پێشتر بەهۆی هێرشی فڕۆکەی بێفڕۆکەوانەوە داخرابوو.

سەرچاوەیەکی بەرپرس بە ئاژانسی هەواڵی عێراقی (واع)ی ڕاگەیاند: "کوەیت بە فەرمی دەروازەی عەبدەلی لەگەڵ عێراق کردووەتەوە."

کردنەوەی دەروازەکەش دوای ئەوە دێت، کە دوێنێ شێخ فەهەد یوسف سعود سەباح، جێگری یەکەمی سەرۆک وەزیران و وەزیری ناوخۆی کوەیت، بڕیاریدا لە ماوەی 48 کاتژمێردا دەروازەی عەبدەلی بۆ هاتووچۆی گەشتیاران و بازرگانی بکرێتەوە.

پێشتر بەهۆی ئەوەی دەروازەکە بە فڕۆکەی بێفڕۆکەوان بۆردومان کرا و زیانی ماددی بەرکەوت، بڕیاری داخستنی درابوو، بەڵام لە ئێستادا دۆخەکە ئاسایی بووەتەوە و کراوەتەوە.