شارەزایەکی کەشناسی ڕایدەگەیەنێت، ئەو شەپۆلە گەرمایەی ماوەی چەند ڕۆژێکە ڕووی لە ناوچە جیاوازەکانی هەرێمی کوردستان و عێراق کردووە کۆتایی دێت و لە جێگەی ئەوە بارستە هەوایەکی فێنکی جەمسەری ڕوو لە ناوچەکە دەکات، بەهۆیەوە پلەکانی گەرما بەرێژەیەکی بەرچاو دادەبەزن.

هەڤاڵ سدیق گەڵۆزی، شارەزای کەشناسی بڵاویکردەوە، بەهۆی پاشەکشەی بەرزەپاڵەپەستانی گەرم و شێداری زەریای هیندی و جێگرتنەوەی بە نزمەپاڵەپەستانی جەمسەری، لە ئەمڕۆ چوارشەممەوە (24ی حوزەیرانی 2026) بارستە هەوایەکی فێنکی مامناوەند لە ڕێگەی تورکیاوە دەگاتە عێراق، هەرێمی کوردستان، وڵاتانی شام، میسر و باکووری سعودیە. بەهۆی ئەم گۆڕانکارییەوە، پلەکانی گەرما بەراورد بە ڕۆژانی ڕابردوو (5 بۆ 7) پلەی سیلیزی نزم دەبنەوە.

ئاماژەی بەوەشکردووە، کاریگەریی ئەم بارستە هەوایە بۆ ماوەی 96 کاتژمێر و تا سەرەتای هەفتەی داهاتوو لە ناوچەکەدا دەمێنێتەوە. هاوکات ڕوونیکردووەتەوە کە تا هەفتەی یەکەمی مانگی تەممووز هیچ شەپۆلێکی گەرمای بەهێز ڕوو لە ناوچەکە ناکات و تەنها گەرمای ئاسایی وەرزی هاوین بەردەوام دەبێت.