وەزارەتی پەروەردەی حکومەتی هەرێمی کوردستان فەرمانێکی وەزاریی نوێی بۆ ڕێکخستنی پرۆسەی تاقیکردنەوە نیشتمانییەکانی پۆلی 9ی بنەڕەتی و 12ی ئامادەیی دەرکرد و تێیدا چەندین ڕێکاری توندی بۆ ڕێگریکردن لە گزی (غەش) و بڵاوکردنەوەی پرسیارەکان ڕاگەیاند.

بەپێی فەرمانەکە کە واژۆی ئالان حەمەسەعید، وەزیری پەروەردەی لەسەرە بردنە ژوورەوەی هەر جۆرە مۆبایلێک بۆ ناو هۆڵەکانی تاقیکردنەوە لەلایەن سەرپەرشتیار و بەڕێوەبەر و چاودێرەکانەوە قەدەغەیە، جگە لەو مۆبایلە تایبەتەی بۆ بەڕێوەبەری هۆڵەکان دابینکراوە. وەزارەت هۆشداری دەدات کە هەر حاڵەتێکی لەو شێوەیە وەک هاوکاریکردن بۆ گزی هەژمار دەکرێت و سەرپێچیکار ڕووبەڕووی لێژنەی لێکۆڵینەوە دەکرێتەوە.

لە بەشێکی دیکەی بڕیارەکاندا هاتووە، پێویستە پێش چوونە ژوورەوە پشکنین بۆ خوێندکاران بکرێت و هەبوونی هەر ئامێرێکی ئەلیکترۆنی، کاتژمێری زیرەک یان مۆبایل لەناو هۆڵدا بە گزی دادەنرێت و بە توندی مامەڵەی لەگەڵدا دەکرێت. هەروەها جەخت کراوەتەوە کە ئەگەر پەڕەی سۆمای خوێندکار بەبێ ناو بگەڕێتەوە، ئەوا نمرەکەی بە سفر هەژمار دەکرێت.

وەزارەتی پەروەردە بڵاوکردنەوەی پرسیارەکانی قەدەغە کردووە و ڕایگەیاندووە، هیچ چاودێر و سەرپەرشتیارێک مافی وێنەگرتن و بڵاوکردنەوەی پرسیارەکانی لە تۆڕە کۆمەڵایەتییەکان نییە. لە کاتی بڵاوبوونەوەی هەر پرسیارێکیشدا، لە ڕێگەی میکانیزمێکی تایبەتەوە خاوەنی پەڕەکە و بەڕێوەبەری هۆڵەکە دەستنیشان دەکرێن و ڕووبەڕووی لێکۆڵینەوەی یاسایی دەکرێنەوە.

هاوکات، مامۆستایان و فەرمانبەران بۆیان نییە دوای تاقیکردنەوەکان پرسیار و وەڵامی پۆلی 12ی ئامادەیی بڵاوبکەنەوە، بەڵکو تەنها لێژنەی باڵای تاقیکردنەوەکان مافی دیاریکردن و بڵاوکردنەوەی وەڵامە نموونەییەکانی هەیە. وەزارەتەکە ئاماژەی بەوەش کردووە کە پرۆسەی تاقیکردنەوەکان پێویستی بە ڕووماڵی میدیایی نییە و وتەبێژی وەزارەت زانیاری و داتاکان بەبێ جیاوازی دەخاتە ڕوو بۆ هەموو میدیاکان.