شەهباز شەریف، سەرۆک وەزیرانی پاکستان، سوپاسی دۆناڵد ترەمپ، سەرۆکی ئەمریکا دەکات بۆ بڕیاری ڕاگرتنی کاتیی "پڕۆژەی ئازادی" لە گەرووی هورمز و جەخت لەوە دەکاتەوە کە ئەم هەنگاوە دەبێتە هۆی بەهێزکردنی ئاشتی و سەقامگیری لە ناوچەکەدا.

سەرۆک وەزیرانی پاکستان لە بەیاننامەیەکدا ڕایگەیاند، وەڵامدانەوەی ترەمپ بۆ داواکارییەکانی پاکستان، عەرەبستانی سعوودی و وڵاتانی دیکە، هەنگاوێکی گرنگە بۆ کەمکردنەوەی گرژییەکان و خزمەت بە سەقامگیریی ناوچەکە دەکات. لەم ڕووەشەوە ئەو بڕیارەی بە "بوێرانە" ناوبرد کە خزمەت بە چەسپاندنی ئاشتی و سەقامگیری لە ناوچەکە دەکات.

ئاماژەی بەوەش کرد، وڵاتەکەی بە تەواوی پابەندە بە پشتگیریکردنی هەموو ئەو هەوڵانەی کە ئامانجیان بەدیهێنانی دانبەخۆداگرتن و گەیشتنە بە چارەسەری ئاشتییانەی کێشەکان لە ڕێگەی گفتوگۆ و دیالۆگەوە.

شەهباز شەریف هیواشی خواست بارودۆخی ئێستا ببێتە سەرەتایەک بۆ گەیشتن بە ڕێککەوتنێکی هەمیشەیی کە ئاشتی و سەقامگیریی درێژخایەن بۆ تەواوی ناوچەکە دەستەبەر بکات.