پێشەوا هەورامانی، وتەبێژی حکومەتی هەرێمی کوردستان لە پەیامێکدا لە تۆڕی کۆمەڵایەتیی ئێکس ڕایگەیاند بە توندی سەرکۆنەی بەئامانجگرتنی هێزەکانی پێشمەرگە دەکەین کە بووەتە هۆی شەهیدبوون و برینداربوونی ژمارەیەک پێشمەرگە

 ئاماژەی بەوەش کرد کە حکومەتی هەرێم هەموو ڕێکارێک دەگرێتەبەر بۆ بەرپەرچدانەوەی ئەو دوژمنکارییانەی دەکرێنە سەر هەرێمی کوردستان

هاوکات وتەبێژی حکومەت داوای لە حکومەتی فیدراڵی و کۆمەڵگەی نێودەوڵەتی کرد کە بە ئەرکی خۆیان هەستن و سنوورێک بۆ ئەو دەستدرێژییە بەردەوامانە دابنێن کە دەکرێنە سەر خاکی کوردستان

بەرەبەیانی ڕۆژی سێشەممە، 24ی 3ی 2026 ، لە ڕێگەی شەش مووشەکی بالیستیی ئێرانییەوە ، دوو هێرشی جیاواز کرایە سەر بارەگاکانی هێزەکانی پێشمەرگە لە سنووری سۆران، کە لە ئەنجامدا شەش پێشمەرگە شەهید بوون و 30 پێشمەرگەی دیکەش بریندار بوون