بەڕێوەبەرایەتیی گشتیی ڕاگەیاندن و هۆشیاریی نیشتمانی لە وەزارەتی پێشمەرگە، ڕاگەیەندراوێکی بڵاویکردەوە و کۆمەڵێک ڕێنمایی و بڕیاری نوێی ئاڕاستەی گشت ئەفسەران و پێشمەرگەکان کرد

هەواڵ:  KNN

بەپێی ڕێنماییە نوێیەکان، وەزارەتی پێشمەرگە بە هەموو شێوەیەک هاتنی دەزگاکانی ڕاگەیاندنی بۆ ناو بارەگا و شوێنە سەربازییەکان قەدەغە کردووە. هاوکات داوای لە میدیاکان کردووە خۆیان بەدوور بگرن لە وێنەگرتنی بارەگاکان. لە لایەکی دیکەوە، پێدانی هەر جۆرە زانیارییەک یان لێدوان بۆ دەزگاکانی ڕاگەیاندن لەلایەن ئەفسەران و پێشمەرگەکانەوە بە هەموو شێوەیەک قەدەغە کراوە.

هاوکات وەزارەتی پێشمەرگە هۆشداریی داوە کە بڵاوکردنەوەی هەر جۆرە وێنە، ڤیدیۆ یان زانیارییەکی تایبەت بە سەنگەر و بارەگاکان لە تۆڕە کۆمەڵایەتییەکان قەدەغەیە. بۆ ئەم مەبەستەش، بەڕێوەبەرایەتیی گشتیی ڕاگەیاندن و هۆشیاریی نیشتمانی ڕایگەیاندووە کە چاودێرییەکی وردی سۆشیاڵ میدیا دەکەن و داوایان لە پێشمەرگەکان کردووە هەر پەیج و ئەکاونتێکی گوماناوی کە بە ناوی پێشمەرگەوە زانیاری بڵاودەکاتەوە، لینکی بۆ بنێرن تا ڕێکاری یاسایی بەرامبەر بگرێتە بەر.

هەر لە ڕاگەیەندراوەکەدا هاتووە کە هەر ئەفسەر و پێشمەرگەیەک پابەندی ئەم ڕێنماییانە نەبێت، ڕووبەڕووی "توندترین سزای سەربازی و کارگێڕی" دەبێتەوە. هەروەها ئەرک خراوەتە سەر ئەفسەرانی ڕاگەیاندن، هۆشیاری، ئۆپەراسیۆنەکان و هەواڵگری لە یەکە سەربازییەکان کە چاودێریی وردی تەواوی جموجوڵەکان بکەن و دڵنیابن لە جێبەجێکردنی ئەم بڕیارانە.