دوای کوژرانی فەرماندەیەکی باڵای  سەرایا سەلام  لە شاری عەمارە، موقتەدا سەدر، ڕێبەری ڕەوتی نیشتمانیی شیعە، پەیامێکی توندی ئاراستەی لایەنگرانی کرد و داوای لێکردن دان بەخۆیاندا بگرن و تەنیا پەنا بۆ ڕێکارە یاساییەکان ببەن

هەواڵ: KNN

  سەدر جەختی لەوە کردەوە کە دەبێت یاسا ڕێڕەوی ڕاستەقینەی خۆی بگرێتەبەر بۆ دۆزینەوەی بکوژان

  هۆشداری دا لەوەی  باوەڕداران  نەبنە بەشێک لەو ئاژاوەیەی کە گەندەڵکاران دەیانەوێت بۆ باشکردنی وێنەی خۆیان دروستی بکەن

 سەدر، هەر جۆرە جوڵەیەکی چەکداری، گرژی نایاسایی، یان مامەڵەی عەشایەریی دەرەوەی ڕێکارە ڕێکخراوەکانی بە توندی قەدەغە کرد

ئێوارەی ڕۆژی هەینی، حوسێن عەلاق (ناوسراو بە دەعلەج)، بەرپرسی سەربازیی سەرایا سەلام لە گەڕەکی موعەلیمینی شاری عەمارە  لە  سەنتەرى پارێزگاى میسان تەقەی لێکرا و دەستبەجێ گیانی لەدەستدا. دوای ڕووداوەکە و وەک کاردانەوەیەک، لایەنگرانی سەرایا سەلام هێرشیان کردە سەر باڵەخانەی سەرۆکایەتی ئەنجوومەنی پارێزگای میسان و نووسینگەی سەرۆکی ئەنجوومەنەکەیان سووتاند، ئەمەش مەترسی سەرهەڵدانی پێکدادانی ناوخۆیی لە پارێزگاکە زیاد کردووە